Kapernum júrøt chø̀m taq vcáng lù:ngò we

Vnvm vchvng rìé, angni nvng angrvtø̀ dang nø namaq svng kapà gø vrūa mvrà.  Kadø íe wani, Vkàngpè Angni nø yaqdø̀:ngí vkǿ di ra dø tiqdvchá tuq daq we svng namaqí èshánønge.  Vsàngí, Mòngzø̀lē, pànøt mànøt íe, wa dvgvp, cv̀mré rívm we svmaré tiq mè chvnvnv́n puqnøn zá pv́ngshi lòng dø tiqdvchá, dvkoq dvtlv́m lòng gø chvnvnv́n tuq rae. Wekvt angmaq nø kadø ínìgø mvlutshì long. Wedø ínìgø vnvm vchvng rìé, namaq nø dø̄ vdòng taq mèv̀lnøng rvt, angni welù:ngí vkǿí dø namaq svng zíkelv́m nø màvl. Namaq shvngbe nø gálòng nvng vyáng angcèrì èínønge. Nøngmaq nø yaqdø̀ngòrì mø̀ísha, dø̄ lòng vdòng vlrì gø mø̀ísha.Wedø í rvt nøngmaq nø, dvgá vsvngrì yøp dø màyøpshaq pán vsha:tnì nø nøt shvriqshàì.Pàwálv́m wani Gvrayí nøngmaq svng shv̀mná høp long* lún dvzv́rlv́m rvt rèhiq bǿshà we mø̀í. Nøngmaq Vkàngpè Yesu Kristu taqkèní chutchv́ng we lún dvzv́rlv́m rvt mv̀ng rèhiq yv̀ngshà. Nøngmaq nø gá:rì nìgø, yø:pmì nìgø*, Ang nvng tiqdø cúnshilv́m rvt Yesu nø nøngmaq dvpvt shì yà:ngì.  Wervtnø̀, namaqí wá èmv́nnøng dø tiqdvchá, dèshat dètúkénøng nø, tiq gǿ nø tiq gǿ nònggùn nàzíkénøng weí leq nàháng lóngnø̀ng.

 

 

 Yesu nø Galili rvgaq, Kapernum tǿò we tiq mvrìng svng yøtshìá:mì. A:ngí narni taq angmaq svng mvshǿl shvngø:tnòe.A:ngí shvngø:tnò kàrì nø vmíng vkv́ng vl we kà í rvt angmaq gvzà dàe. Wekvt júrøt chø̀m vdòngø mvmv́ng cá:ngí dvrūkéò we vsvng tiq pè v̄l we, ang nø shaqmèí vkiq lú:ngì nø, “Nazaret pè Yesué, Nà nvng nøngmaq pà sīnglv́m v̄le? Nà nø nøngmaq svng shvmv́nglv́m lèdì daqì. Nà nø Gvray Ang Shanshér Pè èí we ngàí shánge,” a:lòe.Wekvt Yesuí ang svng ngā:nò nø, “Dø̄ màwá èv̄l; ang yv́ng kèní èlúshi,” a:lòe. Wekvt nø wepè svng mvmv́ng cá:ngí shvngbe dvhø̀ø̄ cē vtūng vdapmò dá:ngí, ang yv́ng kèní lúshiá:mì. Vsvng wepè nø kadø gø mø̀í.  Shvngbe rìràá:mì nø tiq gǿ nø tiq gǿ vrøtkē taqsórí shø̀n we nø, “Yalòng nø kapà kà í ráì? Ang vmíng vkv́ng nvng jórnònggù:ní mvmv́ng cángrì kaq A:ngí dvká:mò kvt, angmaq lvlúshi dá:rì nìnø!” wae. Weyv́ng kèní wervgaq gùrhømhøm kayv́ng màyv́ng svng Ang mòng dvshv̄ng bǿà.