Marta nvng Mari

Wemèpvng tiq ni, vyáng nv̀m gáng rvtø̀ taq, Mamre vbè shǿngsá shvnv̄ng yv́ng Abraham nø shìyat bv́ngkà chit yv́ngø rūng dvgvp, Yehowa nø ang svng dvtánshì daqì.  Ang ngángshi nø dvjaqò nìnø, kū, ang mv́rlapmø vsvng vshø̀m gǿ rip we a:ngí yv̀ng bǿà kvt, angmaq svng vtōlv́m shìyat bv́ngkà kèní kvlv̀ngá:mì nø, vba tø̀m svng kǿngkupshì taqsórí yadø a:lòe. “Ngà Vkàng pèá, nà mv́rdv̀ng taq ngàí jejú lúnò we í kèní nø, nà vshuqpè ngà yv́ng kèní mènàlēni, wv̄ng røtshø̀nge. Tì cvmaq leq lv́ngāvtnøng; namaq hí zv́lshì dv̀ng shǿngtø̀ng lv̀ngpvngø ènārshì ránøng.  Namaq vshuqpè ngà yv́ng svng ètuq ráshà ke nø, namaq vkapshìlv́m dvpvt ngàí zidòng tiq mǿrcè lv́nga a:tnìni; wedá:ngí namaq chàng vlē dv̀ng íe,” a:lòe. Wekvt angmaqí, “Nà èwā dø wá dv̀ng íe,” a:lòe.  Wekvt Abraham nø tiqdvshaqí shìyat vdòng Sara yv́ng svng vjèrá:mì nø, “Bvbò zōng tvnøt vshø̀m dvwv̄m dègø̀ò nø nàkø:nò dá:ngí, zidòng èyēò,” a:lòe.  Wekvt Abraham nø nìnàré svng kvlv̀ngá:mì nø, būbūlicè í nø shvlā we nungwàcè tiq gō shv̀la:tnà dá:ngí, dvzømshú pè svng tvlē bǿà kvt, wepèí gø tiqdvshaqí dvgø̀òe. Wekvt a:ngí nōngdvchit, nìnà nōngtì nvng a:ngí dvgø̀ bǿà we nungwàcè shā gø lv́nga:tnà nø angmaq mv́rdv̀ngø shvrúngāòe. Angmaq v̄m dvgvp, ang nø angmaq shvnv̄ng shǿngtø̀ng lv̀ngpvng ripme. Wekvt angmaqí ang svng, “Nvchø̀m mè Sara kayv́ng v̄le?” wa rø:tnòe. A:ngí, “Kū, shìyat vdòngø v̄le,” a:lòe.  Wekvt A:ngí rá, “Nvpnǿng yarvtø̀ vhø̄m rā kvt, ngà jø̀ngjǿng nà yv́ng svng vrá vwv́ng daknge; èyà:ngò, wekvt nvchø̀mmè Sara nø angcè tiq pè vdá daqe,” a:lòe. Sara nø wepè dø̀mkùng lap shìyat bv́ngkà yv́ng v̄l nø tá dárà. e

Akvt mv̀ng nø, namaq dvpvt ngà dvshàngv́mà rvtnø ngà dvbònge. Kristu Ang góng í we shvngø̀mré dvpvt, Ang dvshà mvhøtrì mvgø̀ mvgø̄m lòng nø ngà shagóng taq ni dvgø̄m bǿà we íe.  Gvray mòngkà kutwa namaq kaq shvngøt lúnlv́m dvpvt, Gvrayí dvzøm bv̀nlì ngà svng èzǿng yv̀ngà dø, shvngø̀mré dvpvt wedø dvzømshú wv́ngshø̀ng rángà we íe.  Yalòng nø dárì tiq bàn mèpvng tiq bàn má yà:ngà we vmáshaq kà í nø, Ang kaq noqshirì svng akvt wa dvtàn daqà we mòngkà íe. Vmáshaq kà yalòng ang ngø̀rdvgùng nø, wv́ngzàrì dvhø̀ taq ìshøt kadvngshìni pǿng we, Gvrayí noqshirì svng shá dvzv́r mvyǿe. Vmáshaq kà yalòng nø, namaq vdòng taq Kristu vl we nvng, Ang wedø vl yv́ng kèní, namaqí ngø̀rdvgùng mvngú lúnlv́m mvshǿl íe. Ngàní lvngàí gø Ang dang dvshvngshò nø, vsvng gǿ vrv̀m svng dvshat dvzitshò sórí, zitnøt shvngbe zø̀mshò nø, vsvng gǿ vrv̀m svng shvngøtshòe. Yadø wàshò lòng nø, vsvng gǿ vrv̀m svng Kristu vdòng taq, kø̀mgøm høq tétǿng dvzv́r nø, Gvray mv́rdv̀ngø dvtuq lúnlv́m dvpvt íe.

 Yesu nvng coqcv́nrì nø mvrìng tiq mvrìng svng tuq ráì. Weyv́ng Marta tǿò we svmaré tiq mèí Yesu svng ang chø̀m taq vtoòe.  Angnv̄m Mari, wa tǿò we tiq mè gø v̄le. Wemè nø Vkàngpè hí yv́ngø rūng nø Ang mòngkà tashìe.  Iwe Marta nø dvzøm bv̀nlì luq nø, nøt shok lú:ngì rvt Yesu yv́ng di nø yadø wae. “Vkàngpèá, vnvm mèí nø ngà wāwā dvzømshi dèzv́r we svng mènøtna ma? Ngà svng dvbv̄nglv́m èv̄lāngà,” a:lòe. Vkàngpèí vtà:ngò nø, “Marta é, Marta é, nà nø bv̀nlì mvme luq rvt góng dègīshi nø shv̀mná mègø̀re. Iwe zǿmdv̀ng lòng nø tiq pv̀n wa v̄le. Mari nø welòng rvcv̄ngshì bǿì. Welòng nø ang yv́ng kèní lúālv́m mø̀í,” a:lòe.