Nøt língshìlv́m shvngøt we

Gvray Mongka

LuKa 13:1-9
 Wenila taq, Galili vsvngrì nø shvt núnglv́m wáshì ke Pilatní angmaq svng sha:tnò nø angmaq shvwi nø angmaqí nú:ngò rì nvng vshúò høq wà bǿà tvrà, Yesu svng dvtáòe.  Wekvt A:ngí vtà:ngò nø angmaq svng, “Galili vsvng werì svng wedø shvt bǿà rvtnø, angmaq nø Galili rì shvngbe mvdv̀mø té mvrà rvnaqe wa dèdvmnøng ma?  Ngàí namaq svng v̄la:tnìni, wedø mø̀í. Namaq gø nøt mèlíngshìnø̀ng kvt kèní nø, wedøni shvngbe nàmv́ng lóngnønge.  Mø̀ínī Silom yv́ng muqtū lóng tvróng vtūng weí shvtke bǿà we tiqcé shvt gǿ nø, Yerusalemø vl rì shvngbe mvdv̀mø mvrà v̄l vsvng íe, dèdv̄mnøng ma? Ngàí namaq svng v̄la:tnìni, wedø mø̀í. Namaq gø nøt mèlíngshìnø̀ng kvt kèní nø, welòng døni shvngbe nàmv́ng lóngnønge,” a:lòe.
Angshí mvshí we nv̀mgwètø̀ng kàshvbóng
 Wekvtrá A:ngí kàshvbóng yalòng gø shø̀:nòe. “Vsvng tiq gǿí ang bìm kùlwàng taq nv̀mgwè tiq tø̀ng ka:tnòe. Ang nø wetø̀ng kèní angshí røpmvmlv́m dì ráì we tiq chv̀ng gø lá mvlú:nò.  Wervt a:ngí kùlwàng vsóngshú pè svng, ‘Eyà:ngò, ya vshø̀m nǿng høq ngàí nv̀mgwè ya tø̀ng kèní angshí røpmvmlv́m dø̄ngnø̀ng gø angshí mvzí. Pàwálv́m vba svng vshø̀ng màshǿng la dvtø̀:mòni, èrǿ:mò,’ a:lòe.  Inìgø wepèí vtà:ngò nø, ‘Vkàngpèá, dènǿng gø shini laq yo; wekvt ngàí gùrhøm dòngò nø ngò* zv́nglv́m íe.  Nvp nǿng lā angshí shí long nìnø shvlae; mvshí lòng nìnø wekvt mv̀ng rǿm dv̀ng íe,’ a:lòe,” wae.