Piterí Kristu vchà:ngò we

Nv̀mlat shvlá taq Israel shìwà mvngpòng cèrì nø Zin rvgaq mvgung sv̀ng tuq ráì nø Kadesh yv́ng v̄le. Angmaq weyv́ng vl dvgvp Miriam shì nø ang svng weyv́ng kǿ:mòe.  Wervgaq taq aqlv́m tì màvl rvtnø shìwà mvngpòng cèrì nø Moshi nvng Aron svng vtùlv́m dvpvt dvkǿmshì nø;  angmaq nø Moshi nvng vzø̀ng taqsórí, “Nøngmaq vnvm vchvngri Yehowa mv́rdv̀ng taq shì dvgvp nøngmaq gø shìapmì pà íni shvla we!  Nøngmaq nvng nøngmaq nìnàrì nø rvgaq mvgung yamóngø dvshílv́m dvpvt, nàí pàwálv́m Yehowa mvngpòng cèrì nøngmaq svng yayv́ng èshølvtshà má?  Yadø chā we rvgaq svng dvtuqlv́m nø, nàí pàwálv́m nøngmaq svng Ejip móng kèní nàgùngvtshà? Mvzí dvyø̀ gø, nv̀mgwèshí gø màvl, bìmrøng gø, yedeqshí tø̀ng gø mvyo; aqlv́m tì gø màvl,” a:lòe. Wekvt Moshi nvng Aron nø shìwà mvngpòng cèrì mv́rdv̀ng kèní búng nø, Dvhø̄mshira Shiyat vdòng svng gòng dá:ngí vbātø̀m svng kǿngkupshìe. Wekvt Yehowa ngø̀r pòngbàng nø angní svng dvtānshì daqì nø;  Yehowaí Moshi svng a:lò we nø, “Dvrv̀ng tv̀ng èlá:ngò; Aron nvng nàní nā:mí nø, shìwà mvngpòng cèrì svng dèkø̀mshò dá:ngí, angmaq negv̀mø vl we lónggá tám kèní tì lā vyø̄ daq dø dèkv́mshò. Lónggá we tám kèní tì shèyǿ bǿshò kvt, Israel shìwà mvngpòng cèrì nvng angmaq nìnàrì shvngbeí tì aq lún lú:ngòe,” a:lòe.  Yehowaí dvká:mò dø tiqdvchá Moshií Yehowa mv́rdv̀ng kèní dvrv̀ng tv̀ng lùò nø;  Moshi nvng Aron níí shìwà mvngpòng cèrì svng lónggá tám mv́rdv̀ng dvkø:mò dá:ngí, Moshií angmaq svng, “Pō vtúshúrì namaqé, ètánøng. Lónggá yatám kèní nílvngàí tì shvyǿāì ni má?” a:lòe. Wedá:ngí, Moshi ang wur hángshì nø dvrv̀ng tàngí lónggá tám svng vní dv̀m vdip bǿà nìnø, tì angwàng vlap daqì nø Israel shìwà mvngpòng cèrì nvng angmaq nìnàrì shvngbeí tì aq lún bǿà.  Wedø ínìgø, Yehowaí Moshi nvng Aron svng, “Ngà nø shànshér pè ǿngà we svng, Israel cèrì negv̀mø nàní lvngàí nø, vpǿ gø mènapǿshà, vlǿm gø mènalǿmv́mshà rvt, Ngàí angmaq svng zǿngò móng svng nàní lvngàí shìwà mv̄ngpòngcè yarì kaq dvgóng màdvzv́rshi,” a:lòe.  Weyv́ng nø Israel cèrìí Yehowa svng vzvtshì nø vtùò rvt gø, Yehowa nø shànshér pè í we angmaq svng dvtà:nò yv́ng í rvt gø, Meriba* tìrì tǿò we íe.

 

  Yesu nø Kesaria Pilipi gùrwāng svng tuq ráì dvgvp, Ang coqcv́nrì svng, “Vsvng angcè pè Ngà nø kagǿ ǿngà we dang vsvngrì kadø wae?” wa rø:tnòe. Angmaqí, “Tiqmaq wani Tiløp Yohan íe wae, vrá tiqmaq wani Eliya íe, gø wae. Dvgá tiqmaq wani Yeremia íe; mø̀íni kàdvtutshúri kèní tiq gǿ íe, gø wae,” a:lòe. l 15 A:ngí angmaq svng, “Ini, namaqí nà! Ngà kagǿ íe wa dèdvmshàe?” a:lòe. Simon Piterí vtà:ngò nø, “Nà nø cúnshì pè Gvray Angcè Kristu èíe,” a:lòe.  Yesuí vtà:ngò nø ang svng, “Yona angcè Simoné, nàí nø ìshøt èlú:nòe. Pàwálv́m wani yalòng nø vsa:ngí nà svng dètan we mø̀í, muqlàng taqlap v̄l pè Ngà Vpèí dètan we íe. n Ngàí rá nà svng v̄lvtnøng: nà nø Piter èíe. Ngà shvngø̀mré nø lóngdø̀ng yachv̀ng mvdv̀m taq Ngàí shvzønglv́m íe. Zùpvng dāng ang jórnònggù:ní* shvngø̀mré svng mvdv́ngké lú:ngò. Ngàí muqlàng móngdànò shv̀msòpuq nø, nà svng tvlēlvm íe. Rvgaq tø̀m taq nàí èdù:ngò we kapà ínìgø, muqlàng taqlapmø gø vdóngshaq ív̄me. Rvgaq tø̀mø nàí shèlà:ngò we kapà ínìgø, muqlàng taqlapmø gø shvlángshaq ív̄me,” a:lòe. Wekvt, Ang nø Kristu í we tiq gǿ svng gø mvshø̀nlvm rvt A:ngí coqcv́nrì svng dvká:mòe. q Yesu shì nø rá zunlong dang dvtáò weWenila kèní kukaq Yesuí Ang nø, Yerusalem svng di nø shaqré shaqtvng mvdò nvng shvrúngshú vjìrì nvng dvrá svrarì wur taq, dvshàlv́m mvme pv̀n tønshi nø shvt bǿò dá:ngí, vshø̀m ni wani taq zunlv́m í we tvrà Ang coqcv́nrì svng dvtá pà:ngòe. Wekvt Piterí Ang svng tiqtōng kaq shø:lò nø, Ang svng ngā:nò nø, “Gvrayí leqgār daq, Vkàngpèá; wedø nø kadvgvp gø mènàhǿm lú:ngò,” a:lòe.  Inìgø A:ngí lè nø wv́l poshì nø Piter svng, “Satané! Ngà mèpvng kaq èyilshi, Nà nø Ngà dvpvt vtøprà èíe. Nàí dèda:mò we nø Gvray nøtnó màrá, vsvng lap kèní wa dèda:mòe,” a:lòe.