Shì rì zūn lōng we

Yesu nø Ang té lú:ngì we Nazaret mvrìng svng tuq ráì nø, Ang wá yà dø tiq dvchá, Narni taq júrøt chø̀m svng gòngá:mì. Kàru rø̄lv́m Ang rip lú:ngì kvt, kàdvtutshú Esaya kàru rvdūl Ang svng tvlēòe. A:ngí poqò nìnø, “Vkàngpè Ang Pvlàcè nø Ngà mvdv̀mø tapshìe; Kadø íe wani mvshámhoq dvshàrì svng Dvbùshv̀ngkà dvshv̄nglv́m dvpvt, A:ngí Ngà svng yøtìí nàdø̄r bǿngà. Vróngshaqrì svng nø shvláng lúnlv́m mvshǿl, nemànrì svng nø vrá yv̄ngshì lúnlv́m shv̀ngkà dvshv̄nglv́m dvpvt gø A:ngí dèzv́r dakngà nø; Shvnv̄lshaqrì svng gø shvlutlv́m rvt nvng; Vkàngpèí vsvng kaq vtō wv́mshì we angnǿng dvshv̄nglv́m dvpvt gø, Ngà svng dèzv́r dakngà,” wa vrū we tiqzàng lá lún bǿà.  A:ngí kàru lòng rvdu:lò dá:ngí jurøt chø̀m vsù:ngò gǿ svng vtv́ngāò nø runge. Wekvt jurøt chø̀mø̄ v̄l rì shvngbeí Ang svng dvjaqdv̀ng wàò dvgvp,  Yesuí angmaq svng, “Shànshér Kàru yaciq nø namaqí ètá bǿshà dø dèni ni vhø̄má:mì we íe,” a:lòe.  Wekvt shvngbebeí Ang kà zø̄aò sórí shvgù:nò nø, Ang nònggøp kèní shø̀n lú:ngì we jejú mòngkà svng dàá:mì nø, “Yapè nø Yosep angcè ni mø̀í ma?” wae.  Yesuí angmaq svng, “Ngà svng namaqí, ‘Cìsvra pèá, nà nø nà dèbānshi lè!’ wa we kàdvcv́n yakà èshø̀nnøng nø, ‘Nøngmaqí tá bǿshà dø tiqdvchá, Nàí Kapernum mvrìng taq èwà bǿà rì nø vdè mvrìng vdè rvgaqø gø èwàò lè!’ wa ni deshø̀n lóngnøngni,” a:lòe.  A:ngí rá, “Ngàí namaq svng v̄la:tnìni, kàdvtutshú kagǿ svng gø vdè móng taq vtoò we màvl.  Ngàí namaq svng v̄la:tnìni, Eliya angni taq, vshø̀m nǿng nvng vchuq shvlá shø̄ mvzaqá:mì kvt, móngkøp taq dvkø̄ wàngrø̀mmè vtit nǿngla taq, Israel móngø memà gvzà v̀l yà:ngì.  Inìgø Sidon móng Zarepta rvwáø memà tiq mè svng wa mø̀í nìnø, angmaq tiq gǿ svng gø Eliya màdvzv́rā yà:ngò.  Vrá, kàdvtutshú Elisha angni taq gø, Israel móng taq mvnggv̄ng í vsvng gvzà v̀l yà:ngì we, Siria móng vsvng Naman tiq pè svng wa mø̀í nìnø angmaq tiq gǿ gø dvshér mvlún yà:ngò,” a:lòe.  Kà yarì svng tá bǿà weó, júrøt chø̀m taq v̄l rì shvngbe høpnøt zø̀ngá:mì nø, sūn dvsún búng lú:ngì weí, mvrìng nv̀mshv̀ng kaq Ang svng lùng bǿà dá:ngí, lónggàng dāng kèní dvjálv́m dvpvt, angmaq mvrìng vrv̄ng yà:ngà vngv̀m vgo høq Ang svng shvlūm bǿà.  Inìgø Yesu nø angmaq dvhø̀ kèní léshì nø loá:mì.