Vléò rì kaq chutnā rà we

Vléò rì kaq chutnā rà we

21 We mèpvng Ang yv́ng svng Piter di ráì nø, “Vkàngpèá, ngà vnvm vchā:ngí ngà svng nàléngvt nìnø ngàí ang svng kadv́ng kvt chutnālv́m í ma? Shvngøt kvt dv́ngte nø vrv̄me ma?” a:lòe. 22 Yesuí ang svng a:lò we nø, “Nà svng v̄lvtnøng, shvngøt kvt wa mvtaq; shvngøt kvt lòng shvngøtcé kvt gø èchutnaò. n 23 Kadø íe wani muqlàng móngdàn nø, koqkv́m tiq pèí ang vshuqrì nvng wulaq shìpan sun mvyǿ lòng nvng vbónge. 24 A:ngí wulaq sun pà:ngò dvgvp, ang svng gv̀msùng tiq mùn talent* vjø we vshuq tiq pè ang yv́ng svng shøla:tnà. 25 Wepè nø teqlv́m pà gø màdá rvtnø, koqkv́m pèí ang gø, angchø̀m mè gø, angcèrì nvng ang vdá dv́ngte shvngbe nv̄m dv̀ng teqlv́m rvt dvká:mòe. 26 Wekvt vshuq wepè kǿng kupshi nø noqò sórí, ‘Vkàngpèá, ngà kaq nøt shèyvngshi; ngàí nà svng shvngbe kutwa teqlv́m íe,’ wae. 27 Wekvt vshuq wepè svng koqkv́m pèí mvré lú:ngà nø, ang svng shvlà:ngò nø, ang shvrv́n shvngbe gø chutnā bǿà. 28 Iwe, vshuq wepè búngá:mì nø, ang svng gv̀msùng tiqyá gø̀m* vjø̄ we vshuq rv̀mnvng tiq pè svng yv̀ng bǿà nìnø, ang svng pvyung mvna:tnò sórí, ‘Nà nàjø we shvrv́n bò ètekngà,’ a:lòe. 29 Ang rv̀mnvng pè nø kǿng kupshi sórí ang svng kórshì nø, ‘Ngà kaq nøt shèyvngshi, nà svng ngàí teqlv́m íe,’ a:lò nìgø, 30 ang mvtá nø, vjø rì mvteqa:tnò dv́ngte ang svng tūng taq róng bǿà. 31 A:ngí kadø wà bǿà we svng dvgá vshuq rv̀mnvng rìí yv̀ng bǿà dvgvp, vtv̄ng kèní nøt za nø, wepèí wà bǿà rì shvngbe angmaq angkàng pè svng dvtáòe. 32 Wekvt angkàng pèí wepè svng goa:tnà nø, ‘Vshuq mvgv́m nà nø, nà èkórshi rvtnø, nà shvrv́n shvngbe nø ngàí chutnāng bǿngà. 33 Ngàí nà svng dvsházāng dø, vshuq rv̀mnvng gǿ svng nàí gø welòng dø dvsházā rà we mø̀í ma?’ a:lò nø, 34 Angkàng pè nø gvzà shv̀mná rí weí, ang vjø we shvrv́n shvngbe teq mvdá:ngò dv́ngte, dvkishúrì wūr taq tvlē bǿà. o 35 Welòng dø namaq tiq gǿ nø tiq gǿí namaq nøt vdòng kèní nvnvm nvchvng rì svng mèchutnānø̀ng kvt kèní nø, muqlàng taqla:pmò Ngà Vpèí gø welòng dø tiqdvchá, namaq svng gø èwà daqnø̀nge,” a:lòe.