Vm vnatshì we vtóng

Vm vnatshì we vtóng

1 “Wāngwāng wa nàkiqnøng, mènǿnshìnøngni. Dòdi shaq dø shaq dètéshìnøng nø, angmaq pō vtù lòng dāng Ngà bashàrì kaq dètánøng. Yaku rvp svng angmaq mvràrì dètānnøng. a 2 Iwe angmaqí nø, vdu vbóng we wàò nø angmaq Gvray øpdvrá svng mvgu:rò we dvcì dø tiq ni mèpvng tiq ni Ngà svng èláng nø, Ngà tvràri shá mvyǿ dø angmaq wáshìe.

Døngman dø dvrá kàciq rvtnālv́m Ngà svng angmaq røtshì nø, angmaq nø Gvray yv́ng tvp níshìlv́m lòng svng nøt shvrúng vsvng dø vshv́me. b 3 Angmaq nø, ‘Nøngmaq màv́m vnatshàì nìgø, Nàí pawá mèyv̀ngshà ma? Nøngmaq cipshàì nìgø, Nàí pawá mèmèshv́lshà ma?’ wae. Eyv̀ngnøng, namaq màv́m nànatshìnøng ni taq namaqí nø, namaq shèrúngnø̀ng rì svng ni èlánø̀ng nø, namaqò bv̀nlì wáshúrì svng shènv́ngnønge.

c 4 Eyv̀ngnøng, namaq v́m nànatshìnøng nìgø vshvtlv́m vzø̀nglv́m, nøt mvgá:mí vdø̀rkelv́m lù:ngí shèlénønge. Namaq dèni èwanø̀ng dø v́m nànatshìnøng kèní nø, namaq røtkà nø vháng yv́ng ètáā dáìe, mèlv́nshìnøngni. 5 Ngàí rvcv̀ng bǿngà we màv́m vnatshìlv́m angni nø, vsvng vdè cipshìlv́m, gūngzì vngøq padø vgo ngǿmshìlv́m nvng dvnggǿ gwāshì nø waqpú taq løqshìlv́m hv̄ncè wā wàlv́m dvpvt v́m vnatshì lòng íe ma?

Yehowaí zø̄a we màv́m vnatshì we angni nø, yahv̄ncè wa wàlv́m angni íe, èlv́nnønge má?d 6 Ngàí rvcv̀ngò we màv́m vnatshìlv́m lòng nø, màdvrá weí dù:ngò mv̄ngbǿngrì svng pǿnālv́m, rídø̀mrì kāālv́m, shvnip shvnv̄l kéòrì svng shvlàng nø paqdv̀ngrì í dv́ngte svng giqālv́m dvpvt mø̀í ma? 7 Màv́m vnatshì lòng nø, svríshi rì kaq namaq v́mpà vwálālv́m, chø̀m màdá we dvrvtrì kaq namaq chø̀m svng dvgònglv́m, góngsér írì èyv̀ng bǿnøng kvt dvgwā nø, vdè shīng shvwi cèrì taqkèní mvmáshìlv́m dvpvt mv̀ng mø̀í ma?

e 8 Wedø èwànø̀ng kvt mv̀ng nø, namaq gálòng nø vsháng gá daq lòng dø í longe. Namaq kaq dvbānlv́m lòng gø tiqdvshaqí tuq rae. Namaqò døngman lòng gø namaq vzv̀ngzv̀ng di nø, Yehowa Ang pòngbàng ngø̀r lòng nø namaq mèpvng lap roqshú wáshì longe. f 9 Wekvt namaqí ègōnøng dvgvp Yehowaí natv́n daqnø̀nge.

Namaq svng dvbv̄nglv́m èrøtshìnøng dvgvp A:ngí, ‘Ngà yayv́ng v̄le,’ wa nàtv́n daqnø̀nge. Namaq dvhø̀ø̄ vl we rídø̀mrì svng èkānøng nø, mvgv̄m màshvla we kà èshø̀nnøngrì nvng shvrà we wurhàmí tènūnøng we laqyà ègurnøng dá:ngí;