Vmyø̀ wø̄n kàshvbóng

Wekvt angmaq Elim kèní búngá:mì nø, Israel shìwà mv̄ngpòng cèrì shvngbe nø, Ejip móng kèní búng ráì mèpvng vní shvlá tiqcé pùngwà ni taq, Elim nvng Sinay shigùng dvhø̀ø̄ í we Sin Rvgaq Mvgūng yv́ng tuqá:mì.  Rvgaq mvgūng móng taq Israel shìwà mv̄ngpòng cèrì nø Moshi nvng Aron kaq vbø̄nshì lú:ngì.  Israel dvcì cèrìí angní lvngà svng, “Nøngmaq nø shā taq shvnvng rú:ngì nø, zidòng vgáshaq v́m lú:nì we Ejip móngø, Yehowa wur taq shìì nìnø té shvla we! Nàní lvngàí nø rvgaq mvgūng yamóng svng èshølshà nø, nøngmaq shìwà mv̄ngpòng cèrì shvngbe svng svríí dvbvtlv́m èdv́nshàe,” wae.  Wekvt Yehowaí Moshi svng, “Eyà:ngò, namaq dvpvt muqlàng kèní Ngàí zidòng lāā daqìe. Bashà rì nø ni vrv̀m léshì nø, weni v́mlv́m dvpvt weni tǿvm ràe. Yalòng taqkèní angmaqí Ngà dvrá svng cv̀n mvcv̀n lú:ngò we Ngàí vløtlv́m íe. Vchuq ni wani taq nø, angmaqí tǿvm lún bǿà dv́ngte v́mlv́m dvgǿshì ke, dvgáni ni vrv̀m tǿvm lú:nòrì mvdv̀m tiq gvtvp mvzv́n tǿvm rà longe,” a:lòe. Wekvt Moshií Aron svng, “Nàí Israel shìwà mv̄ngpòng cèrì svng, ‘Namaq nàbø̄nshinøng we kà svng Yehowaí tá bǿà, wervt namaq nø Yehowa mv́rdv̀ng svng èdì ránø̀ng,’ èa:lò,” a:lòe. Aroní kà yalòng Israel shìwà mv̄ngpòng cèrì svng shø̀:nò lā:ngí, angmaqí rvgaq mvgūng svng dvjaqò nìnø, kū, Yehowa Ang pòngbàng nø rvmøt taq dvtánshì daqì.  Wekvt Yehowa Moshi svng kà shø̀n nø,  “Israel dvcì cèrì vbø̄nshì we kà svng Ngàí táng bǿngà. Angmaq svng yadø èa:lò. ‘Dø̄rø̀:mí nø shā ké èlúnnøng nø, vshá:ngí nø zidù:ngí nàgà lóngnønge. Wekvt Ngà nø namaq Gvray Yehowa ǿngà we svng èshá lóngshàe,’ èa:lò,” a:lòe. j Bòngv̀m lā daqà lòng  Wervtnø̀ weni dørø̀m høqa:tnà kvt bòngv̀m vlāng ráì nø angmaq zóngrì gø̀m wv̄ma:tnà. Vshá:ngí nø zóngrì gùrhøm shvngǿr vlatna:pmì. Shvngǿr rì zø̄ lú:ngì kvt nø; ku, rvgaq mvgūng taq tvwv̀n cipcè dø vshv́m we tø̀r ídv̀ng wa tiq pv̀n chat vlatná:mì.  Yalòng svng Israel bashà rìí yv̀ng bǿà nìnø, angmaq tiq gǿ nø tiq gǿ vrøtkē nø, “Yalòng nø pà í ráì?” wae. Kadø íe wani, werì nø pà í we angmaqí mvsháò. Wervt Moshií angmaq svng, “Yalòng nø namaq v́mlv́m dvpvt, Yehowaí èzí daqshà we zidòng íe.