Vmyø̀ wø̄n we kàshvbóng

Vmyø̀ wø̄n we kàshvbóng

1 Yesuí nø tìnúng shvnvng yv́ng rá tiq kvt mvshǿl shvngø:tnòe. Ang vl yv́ng vsvng loksok gvzà kø̀m ráì rvtnø, Ang nø tìnúng mvdv̀m kùngshí vdòng svng zv́ngshì nø runge. Vsvng loksok shvngbe nø tìnúng vdàm vba tø̀mø runge. a 2 A:ngí kàshvbóng kèní angmaq svng mvme pv̀n shvngø:tnò nø, yadø a:lòe. 3 “Etá dánøng! vmyø̀ wø̄n vsvng nø, vmyø̀ wø̄n nvng búngá:mì. 4 A:ngí wø:nò dvgvp, tiqmaq nø tvrà shvmor taq vjáá:mì nø, ca rìí tǿvm bǿà. 5 Tiqmaq nø vba gvzà mvtvt we lóngheq mvdv̀m vjáá:mì. Vba gvzà mvtvt rvtnø tiq dvshaqí yó lú:ngì nìgø, 6 nv̀m svr ráì nø vkatshi lú:ngì kvt gángkéò weí, angrø̄ màvl rvtnø shúngá:mì. 7 Tiqmaq nø bv̀nghǿ póng vdòng svng vjáá:mì nø, bv̀nghǿ rì té lú:ngì weí lúmkéò rvt angshí mvzí lōng. 8 Tiqmaq nø vba shvlá yv́ng vjáá:mì nø, té gø té lú:ngì, vzá gø vzashi nø angshí zí lú:ngì nìnø, tiqmaq nø vshø̀mcé dvtv̀ng, tiqmaq nø vchuqcé dvtv̀ng, tiqmaq nø tiq yá dvtv̀ng shóng lú:ngì. 9 Tálv́m vnà vdá vsvng wegǿ nø laq tashi,” a:lòe. 10 Ang wawa vl dvgvp, Ang nvng v̄l rì nvng coqcv́n we tiqcé vní pèí kàshvbóng welòng dang Ang svng rø:tnòe. 11 Wervt A:ngí angmaq svng, “Gvray móngdàn mvshǿl vmáshaq kà nø namaq svng nø vzíshaq íe. Inìgø, vtv́nglap vl vsvng rìí nø kàshvbóng kèní shvngøt we wa lú:nòe. b 12 Yalòng nø, angmaqí dvjaqò nìgø mvyv̀nglv́m, táò nìgø mvcínglv́m dvpvt kàshvbóng zø̀mò we íe. Angmaqí yà:ngò nø cíngràl lú:ngò kvt nø angmaq nøt vwv́ngshì ra nø mvrà chutna we lú:nò ni we íe, wa kà vhø̄m lv́m rvt íe,” a:lòe.c Kàshvbóng lvjø̄m pǿ:nò we 13 Wekvtrá Yesuí angmaq svng, “Kàshvbóng yalòng svng namaqí mècíngnøng nìnø, dvgá kàshvbóng rì svng nø namaqí kadøwa ècíngnøngni? 14 Vmyø̀ wø:nò gǿ nø Gvray Mòngkà wø:nò gǿ íe. 15 Tvrà shvmor yv́ng wø:nò we mòngkà nø, angmaqí tá bǿà mèpvng, wela:ngí ni Satan dì ráì nø, angmaq nøt vdòng wø̄n bǿà kà svng lùv́m bǿò rì íe. 16 Lóngheq mvdv̀mø wø̄n bǿà rì nø, mòngkà svng tá bǿà chàng dvbùnø:tní vtoò rì íe. 17 Iwe angmaq nøt vdòng taq angrø̄ mvcaqshì rvt tiqlvngcè wa zá:nòe. Angmaq nø Gvray mòngkà rvt dvshà we, mø̀íni vrè we vhǿm lú:ngò kvt, zv̄ngwā lángshiv̄me. 18 Bv̀nghǿ póng vdòng wø̄n bǿà rì nø mòngkà svng tá bǿà nìgø, 19 rvgaq yabàn gónggilv́m rì nvng pø̀í yù:mò we nvng dvgá angpv̀npv̀n svng map we nøt gòng ra weí mòngkà svng zvpkéò rvtnø, angshí mvzí mvdò íe. d 20 Vba shvlá yv́ng wø:nò rì nø, mòngkà svng táò dá:ngí, vtoshirì íe. Yarì angshí shí long kvt nø, vshø̀m cé dvtv̀ng, vchuqcé dvtv̀ng, tiqyá dvtv̀ng, shóng long rì nvng vbónge,” a:lòe.