Vshø̀m mvrìng ngā:nò we

 Wenila taq, Lewi dvgø̀ng kèní vsvng tiq pè nø Lewi rvpcè ni í we svmaré tiq mè lūshìe.  Wekvt svmaré wemè nø cv̀mré góng íá:mì nø angcè tiq pè gv̀l daqà. Wepè nø góng mv̀rshv̀m vnvp we svng angmèí yv̀ng bǿà kvt ang svng vshø̀m shvlá máòe.  Wedø ínìgø angmèí ang svng zv̀ndvtut má mvlún bǿà kvt, a:ngí ang dvpvt vjū zv́mcè tiq chv̀ng láò dá:ngí, lóng rvnø̀ng nvng shǿng rvnø̀:ngí záòe. Wedá:ngí cv̀mré pè svng a:ngí vzv́m wechv̀ng vdòng taq zá:ngò nø, Nil rvmè tìrìn rām vjusá vdòngø vyà:lòe.  Angnv̄m mè nø ang kadø bø̀nvm we svng yv̀nglv́m dvpvt vsar yv́ng ripme.  Wekvt Farao angcèmè nø tì zv́lshìlv́m rvt Nil rvmè svng yøtshì daqì nø, dvzømshú mèlā nø tìrìn rāmø vsē ke, vjusá vdòngø vzv́mcè wechv̀ng a:ngí yv̀ng bǿà nø ang yv́ng svng lvlv́nga:tnò dø dvzømshú mè svng dvzá:ròe.  A:ngí vzv́mcè wechv̀ng ang wv̄m pú:ngò nìnø, cv̀mré pè zv́ngshì we svng yà:ngò nø; “Ku, cv̀mré pè nø ngǿ dárì.” Wekvt a:ngí mvré lú:ngà nø, “Cv̀mré yapè nø Hebrucè tiq pè lvíni,” wae. Wekvt cv̀mré pè angnv̄m mèí Farao koqkv́m angcèmè svng, “Nà dvpvt cv̀mré yapè svng nōng dvcøqalv́m, Hebru mèlā kèní koqlu tiq mè lángangvtnøng ma?” wa rø:tnòe. 8 Farao angcè mèí, “Shvlāe, èláa:tnò,” a:lòe. Wervt svma svré mè dìá:mì nø cv̀mré pè angmè svng ni gōa:tnà. Wekvt Farao angcè mèí wemè svng, “Cv̀mré yapè nàbūn bǿò nø nong dècøkngāngà; dvkúm zìbè ngàí nà svng zíkà íe,” a:lòe. Wekvt svmaré wemèí cv̀mré pè svng vbūn bǿà nø nōng dvcøqāòe.  Cv̀mré wepè té lú:ngì kvt Farao angcèmè mv́rdv̀ng svng a:ngí shøla:tnà nø, koqkv́mcè mèí angcè dvdu:tnò nø, ang bø̀ng nø “Moshi,” wa tǿòe. Kadø íe wani, “Ngàí ang svng tì taqkèní cø̀ng bǿngà,” wae. Midian móng svng Moshi vt we  Moshi té lú:ngì mèpvng tiq ni taq ang dvcì cèrì svng tìná:mà nìnø, vlishì we angmaq bv̀nlìrì svng yà:ngòe. Wekvt ang dvcì í we Hebru vsvng tiq pè svng Ejip vsvng tiq pèí vdip dáò we svng yv̀ng bǿà.  Wekvt a:ngí kukaq yakaq dvjaqò nìnø vsvng tiq gǿ gø mvyà:ngò rvt, Ejip vsvng pè svng cùngshí sha:tnò nø zishìl rv́m lø:pmòe.  Mèpvng ni taq gø ang dìá:mì nìnø, Hebru vsvng vní pè vrá vshvt dā we svng yv̀ng bǿà kvt, vléò pè svng, “Nà tiqdv́ng vsvng tiq pè svng nàí pàwálv́m nàdi:pmòe ma?” a:lòe. Wepè vtv́ngshì nø, “Kagǿí nà svng ngàní lvngà dvhø̀ taq øpshú nvng kàngéshú èzv́ng bǿì ma? Ejip pè svng èshvtna:pmà dø ngà svng gø shvtlv́m èwv̀ngà ma?” a:lòe. Wekvt Moshi svre lú:ngì nø, “Ngàí wv̀ngvpmà tvrà nø vsangí sháa:pmà pa íe,” wae. Yalòng svng Farao koqká:mí tá bǿà kvt Moshi svng shvtlv́m láòe. Wedø ínìgø, Moshi nø Farao yv́ng kèní vtshì nø Midian móng taq v̀lá:mì. Tiq ni taq ang nø tìdùng tiq yv́ng nārshìe

 

 

 

 

 

Mati 11:20-24

 We mèpvng Yesuí nø, Ang jórnònggùn bv̀nlì té wà bǿà we mvrìng rì angmaq nøt màwv́ngshi ra rvtnø, ngv̄n pà:ngò nø yadø wae. “Korazin mvrìngé, nà nø mèhøt longe; Betsayda mvrìngé, nà gø mèhøt longe. Kadø íe wāni nàní dvhø̀ taq wv̀ng bǿngà we jórnònggùn bv̀nlì rì nø, Tiru nvng Sidon wamàní taq lā wv̀ngò pà í nìnø, cáyaqni dvnggǿ gwāshì nø, waqpú taq rūng sórí nøt dvlíngshivpni. q Ngàí nàní svng v̄lvtshìni, kàngé daq we angni taq, nàní mvhøtlv́m lòng nø, Tiru nvng Sidon wamàní mvhøtlv́m lòng mvdv̀m té vlishi longe.  Kapernum mvrìngé, Nà svng nø muqlàng høq ni èhàng longe èlv́nshi ma? Zùpvng dāng svng lè dèdòr bø̄e. Kadø íe wani nà vdòng taq wv̀ng bǿngà we jórnònggùn bv̀nlì rì nø, Sodom mvrìng taq wv̀ng yv̀ngò pa í nìnø, Sodom nø dèni høq v̄lni we íe. Ngàí nà svng v̄lvtnøng, kàngé daq we angni taq, nà mvhøtlv́m lòng nø, Sodom mvhøtlv́m lòng mvdv̀m té vlishi longe,” a:lòe.