Vsvng 5,000 shvá:mò we

Monday, August 05, 2019

Gvray Mongka Tiq Tut

Dvcìrø 11:4-15

Wekvt Israel dvcì cèrì dvhø̀ taq zv̀n we wv́ngzàrì nø, shā rvyúí shì lú:ngì nø, Israel cèrì gø wedøni shā rvyúí shì lú:ngì weí, “Sha dvgø̄é, kagǿí dvbvng shā mèzía:tnìe?” wa nø ngǿ lú:ngì. Ejip móng taq wv̄n mvrà dø ké lún yv̀ngshà we ngāsharì svng nøt lóngshà. Dv̀nggwà, tìsup dv̀nggwà, shùrì, gvrōshèrì nvng gvrō múng á:mìrì svng gø mvrøt lóngshà. Nøngmaq nø Manna zidòng wa á:mì weí nàzèke lóngshà. Dvgá v́mlv́m pàgø màvl, wae. Manna welòng nø bv̄nzishí dø vshv́m nø ang mv̀rshv̀m nø Bvdelim* shǿng rvnø̀ng dø vshv́me. Manna werì nø bashà rìí zóng gùrhøm rvgaq kèní tǿò nø, loklv̄ng taq jø:kngò, shv́pv̀ng taq dǿ:rò, taq taq kø:tnò, mø̀í ni zidòng yeá:mò nìnø zanlún yøtìí vyēshaq zidòng dø gv̄me. Yaqdø̀:ngí zóngdap svng shvngǿr zaq daq kvt Manna gø vjā daqe. Bashàrì tiq rvp nø tiq rvp vdèdè zóng bv́ngkà yv́ng gǿ vrv̀m ngø̄ we svng Moshií tá bǿà. Wervt Yehowa nø angmaq svng shv̀mná høp lú:ngì nø Moshi nø rá nøt dvshàá:mì. Wekvt Moshií Yehowa svng, “Nà vshuq pè ngà svng Nàí pàwá lv́m rvzaqtat yadø vhǿm dèzv́ràe má? Nà mvwv́mshìlv́m dø ngàí pà wá vléng bǿngà rvt bashà yarì shvngbeò døngjá nø ngà svng shèrø̄ngàe má? Bashà yarì nø ngà puqwá taq rǿng yv̀ngà rì íe má? Ngàí gv̀l yv̀ngà rì í rvtnø Nàí ngà svng, ‘Angmaq angkop angkàng rì svng zílv́m dègv́mshì yà:ngì móng høq, Cv̀mré rvlìcè tiq gǿ svng koqlu tiq gǿí vbū:nò padø nà pøtpúm taq angmaq svng nàbūn bǿò,’ èwae má? Bashà yadv́ngte svng zílv́m shā nø ngàí kayv́ng kèní lvlúnò nǿng? Angmaq nø ngø sórí, ‘Nøngmaq svng kélvm shā èzíshà,’ lvwāni! Ngà tiq gǿí wa nø bashà yadv́ngte dvpvt døngjá rí mvdv́ngò. Ngà dvpvt mvnøklá vlīshìe. Nàí ngà svng yadøni wàlv́m í kvt kèní nø, bvbò ngà svng èshvtnà. Ngàí Nà mv́rdv̀ng taq jejú lúnò we í kvt kèní, ngà svng yadv́ngte mvhøt mèdèzv́rànøng nà!” a:lòe.

Mati 14:13-21

Yesuí tá bǿà kvt kùngshí taqtaq we rvgaq kèní búng nø yilshìá:mì nø, Ang wāwā tiqyv́ng v̀llv́m yilshìá:mì. Yalòng dang vsvng loksokrìí tá bǿà nìnø, mvrìng rì taqkèní hí tvràrà di nø Ang svng láá:mà. Kùngshí taqkèní Yesu léshì lú:ngì nìnø, vsvng loksokrì svng yv̀ng bǿà. Wekvt A:ngí angmaq svng mvré lú:ngà nø, angmaq zarì svng dvbānaòe Dørø̀m í ráì kvt, coqcv́nrì Ang yv́ng dì ráì nø, “Yayv́ng nø rvgaq dø̀ngjàm íe, nv̀m gø vlēá:mì, vsvng loksokrì nø rvwá rvgaq svng di nø vdèdè v́mlv́m lvwv̄nv̄m dø angmaq svng dèkā:ngò lè,” a:lòe. Yesuí angmaq svng, “Angmaq vkàng mvrà, namaqí angmaq svng shèv́mnøng,” a:lòe. Angmaqí Ang svng, “Nøngmaq yv́ng nø zidòng pungwà chv̀ng nvng Ngā vní go wa v̄le,” a:lòe. 18 A:ngí, “Werì Ngà yv́ng èlv́ngvtnøng,” a:lòe. A:ngí vsvng loksokrì svng shø̄n mvdv̀m rúng dvzá:rò dá:ngí, zidòng we pungwà chv̀ng nvng ngā goní lá:ngò nø, muqlàng kaq kāng ngángshi dvjaq sórí, A:ngí shvmán dv̀ng zidòngrì vmø:tnò nø Ang coqcv́nrì svng tvlēòe. Coqcv́n rìí nø vsvng loksokrì kaq túnāòe. Wekvt angmaq shvngbeí á:mò nø vgàá:mì. Vm vchéò we angshirì rvku:lò nìnø, tiqcé vní jv̄ng dv̀n íe. Vm bǿì rì nø, svmaré nvng cv̀mré rì màrø̄shaq, lvngàré rì wā pungwà kíng gǿ dv́ngte íe.