Vsvng 5,000 shva:mo we

Yohan 6:1-15

Yadv́ng pv̀n mèpvng Yesu nø, Tiberia tǿò we, Galili tìnúng kupa svng dìá:mì. a 2 A:ngí zarì dvbanaò we vtiqlv́mrì svng yv́ng lú:nò rvtnø, vsvng loksu:kngí gø Ang mèpvng cà:nòe. 3 Yesu nø shìgùng svng ngangá:mì nø Ang coqcv́nrì nvng weyv́ngø rūnge. 4 Wedvgvp nø Yuda vsvng rìò Shvle Bóy gø tuq yùl ráì. b 5 Vsvng loksok Ang yv́ng svng di ráì we Yesuí yv̀ng bǿà nìnø, Filip svng, “Vsvng yadv́ngte v́mlv́m dvpvt, nøngmaqí kayv́ng kèní v́mpà wvnlv́m?” a:lòe 6 A:ngí yadø a:lò we nø, Filip svng vlø:tnò we wa íe. Kadø íe wani A:ngí kadø wàlv́m nø Ang sháshìe. 7 Wekvt Filipmí Ang svng vtà:ngò nø, “Nøngmaqí gv̀msùng vní yá denari* dvpǿ la wa:nì nìgø tamǿrcè gø vpvt nà mø̀í,” a:lòe. 8 Wekvt Ang coqcv́nrì kèní tiq pè í we, Simon Piter angnv̄m pè Anderuí ang svng, 9 “Zōngshār zidòng pungwà gø̀m nvng ngàcè vní go vdá we lvngàsvré tiq pè nø yayv́ngø vl we; ínìgø vsvng yadv́ngte luq dvhø̀ taq nø yarì pà shǿn tv́mshì má?” a:lòe. c 10 Yesuí, “Vsvng rì rúng dèzv́rnøng,” a:lòe. Wezàng nø shønlat mvme yoe. Wekvt angmaq rúng bǿì; lvngàré rì røbø̀ng nø pungwà kíng dv́ngte íe. 11 Wekvt Yesuí Zidòngrì lùò nø, Gvray kaq oqà wa dá:ngí, rúng bǿì rì svng túnaòe. Welòng dø ngārì gø angmaq shòng dv́ngte túnaòe. 12 Angmaq vgàá:mì kvt, Yesuí Ang coqcv́nrì svng, “Tiq hvn gø màmv́nglv́m dvpvt, v́m vchéò we mvzarì rèkulnøng,” a:lòe. 13 Wervtnø̀ angmaqí rvku:lò nø, zōngshār zidòng pungwà gø̀m kèní v́m bǿì rìí vchéò we mvzari nø, tiqcé vní jv̄ng dvzǿng bǿà. 14 A:ngí wà bǿà we shálv́m mvshv́lpvrá yalòng svng vsvng loksu:kngí yv̀ng bǿà kvt, “Yapè nø jø̀ngjǿng ni rvgaq tø̀m svng dìlv́m vdv́nshaq pè, kàdvtutshú wepè ni íe,” wae. d 15 Weyv́ng kèní angmaqí, Ang svng mvdø̀ng mvdaq koqkv́m zv́nglv́m wàò we svng Yesuí dǿm bǿà rvtnø, Ang nø vrá tiq kvt Ang wawa shìgùng svng yilshìá:mì.