Yaku rvp Ejip móng svng yīlshì we

Gvray Mongka Tiq Tut Nvmlat Nvmpvng 46:1-7,28-30

  Wemèpvng Israel nø ang vdá we í dv́ngte vgūngshì sórí búngá:mì nø, Beersheba rvgaq yv́ng tuq ráì. Weyv́ngø angpè Isak ang Gvray kaq shvt núngpà shvrú:ngòe. Yaqdø̀:ngí, shø̀ngran taq Gvray nø Israel svng kà tv́ngshì nø, “Yakuá, Yakuá,” wa gōòe. A:ngí, “Ngà yayv́ng v̄le,” wa vtá:nòe. Wekvt Gvrayí, “Ngà nø Gvray ǿngà nø nvpè ang Gvray ni ǿngàe. Ejip móng svng shúngshìlv́m mèsèreni; kadø íe wani wervgaq taq Ngàí nà svng nø dvcìmè dvzìng shvluqlv́m íe.  Ngà nø nà nvng tiqdø Ejip móng svng shúngshø̀ng nø weyv́ng kèní nà svng Ngàí ni dvtv̀nglv́m íe. Nà nē gø Yosepmí èsø̄m lōnge,” a:lòe. Wekvt Yaku nø Beersheba kèní búngá:mì. Israel angcèrì nø angpè Yaku nvng angmaq cv̀mrérì nvng angmaq chø̀mmè maq nø, Farao koqká:mí Yaku svng vgùnglv́m dvzv́r lú:ngà we gàrìrì taq tòòe.  Kanan móng taq angmaqí lún yà:ngà we angmaq nìnàrì gø, angmaq dvzøm dvrèrì gø vgūngshì sórí, Yaku nvng ang pvlí angpvlaqrì nø ang nvng tiqdø, Ejip móng svng dvtuqshi yà:ngì.  Angcè pèla nvng ang pvlí pèla gø, angcè mèlā nvng ang pvlí mèlā gø, ang pvlí pvlaqrì shvngbe gø ang nvng tiqdø, Ejip móng svng Yakuí shøl yà:ngà.Goshen rvgaq svng dvtuqshilv́m tvrà ang vzv̀ngzv̀ng dvtúlv́m dvpvt, Yakuí Yuda nø vzv̀ng kaqkaq Yosep yv́ng svng dvzv́r bǿà nø, angmaq nø Goshen rvgaq svng dvtuqshi yà:ngì.  Wekvt Yosep nø angpè Israel svng vhø̄mlv́m, ang cìlgàrì dvcøpshì nø Goshen rvgaq svng ngāngá:mì. Yosep nø angpè mv́rdv̀ngø tuq ráì chàng, ang lóngjvng taq dvchiqshì sórí, mvme tiq dvgvp ngø̄e.  Wekvt Israelí Yosep svng, “Nà akvt høq ècúnshì dá:rì we nà mv̀rshv̀m svng ngàí yv́ng lún bǿngà rvt, akvt nø shø̀ngnøng gø nøt shø̀mv́mà,” a:lòe.

Mati 10:16-23