Yehowa nø Gvray í we

Darì kāngshv́ng mvril Gvrayí rvgaq yalòng taq vsvng pv́n yà:ngà ni kèní yakaq svng dèdv̄mnø̀ng. Muqlàng yamvtú kèní kūmvtú høq gø ègùnnø̀ng. Yadv́ngte tē we bv̀nlì wà yà:ngà we dvgá v̄le ma? Yadv́ngte ring we nø kadvgvp tá dá:rì ma?  Namaq døni svmi vdòng kèní Gvray shø̀n kà svng táò dá:ngí cúnshì lú:nò we dvgá dvcì rì v̄le ma?  Namaq Gvray Yehowaí Ejip móng taq wà yà:ngà dø vløtlv́m, vtiqlv́m, shálv́m, cìl vtùlv́m, Ang jórnònggùn kv́ng we wur zúshi nø wà bǿà we bv̀nlì nvng svre vdv̀nlv́m pv̀nrì wàò nø Ang bashà wāshìlv́m dvpvt dvgá tiq móng kèní dvcì tiq dvcì vgúng ngu:tnò we dvmø̀ dvgá v̄le ma? Namaq svng yadv́ng pv̀n dètān yv̀ngshà lòng nø, Yehowa nø Gvray í nø, Ang mvdv̀m dvgá Gvray màvl we namaqí shálv́m dvpvt íe.  Namaq svng shvngøt dvzitlv́m dvpvt, muqlàng rām kèní Ang kà tá lún dèzv́rnø̀nge. Rvgaq tø̀m taq gø Ang rīng we svmi namaq svng dètannøng nø, svmi vdòng kèní Ang shø̀n kà svng gø namaqí ètá yv̀ngshà.  Nvkop nvkàng maq svng Ang shóngshì rvtnø, angmaq mèpvng angcø àngcèrì namaq svng gø A:ngí rècv̀ngnøng nø, Ang jórnònggùn vtā:ngí Ang vdèí ni namaq svng Ejip móng kèní nàgùngvtshà.  Namaq mvdv̀m té rīng nø nònggùn té kv́ng we vsvng dvcì rì svng gø namaq mv́rdv̀ng kèní A:ngí lù:ngò nø, dèni í dv̀ngwa angmaq móng nø namaq zaqshøp washìlv́m dvpvt, namaq svng zílv́m èshølvtshà we íe.  Wervt muqlàng mvdv̀m taq gø, rvgaq mvdv̀m taq gø, Yehowa Ang wa Gvray íe wa, dèni namaq nøt vdòng taq mèsø̄ngnø̀ng nø nàshatnøng. Ang mvdv̀m dvgá Gvray màvl. Wervtnø̀ namaq nvng namaq mèpvng nvcǿ nvcè rìí gø shøtshú lúnlv́m dvpvt nvng namaq Gvray Yehowaí namaq svng dvciq lvpat dvpvt èzínøng we móng taq gǿngzø̀l gǿngyàng v́l lúnlv́m dvpvt, dèni ngàí namaq svng zíì we Ang shvdøngshaq dvrárì nvng dvkv́mkàrì svng vpǿ nø cv́n dvdø̄ng ràe,” a:lòe.

Wekvt Yesuí Ang coqcv́nrì svng a:lò we nø, “Ngà mèpvng cv́n mvyǿ we kagǿ gø, vdè svng ngálshi nø, vdè wurgang baqshi sórí Ngà mèpvng laq cv̀n ra.  Vdè gø̀nshaq mvpáshi gǿ nø, gø̀nshaq vmvngvme. Iwe Ngà dvpvt rvtnø gø̀nshaq vmvng gǿí mv̀ng nø, gø̀nshaq lá lún lú:ngòe.  Vsa:ngí nø, móng dø̄ngtáng shvngbe, wáshì lú:nò nìgø, ang gø̀nshaq* sǿmv̄m nìnø, a:ngí pà vjú lú:nò ma? Mø̀í ni vsvng tiq gǿ ang gø̀nshaq nø kapàí chēshì lún daqe ma?  Kadø íe wani Vsvng Angcè pè Ngà nø, muqlàng dvzv́rrì nvng tiqdø, Vpè pòngbàng ngø̀r we nvngnvng dìlv́m dv́nshø̀nge. Wekvt mv̀ng nø angmaq vdèdèí wàò we bv̀nlì rì svng cv̀no nø, tiq gǿ nø tiq gǿ svng vwv́ngalv́m íe.  Ngàí namaq svng v̄la:tnìni, yayv́ng rip rì taqkèní tiqmaq nø, Vsvng Angcè pè Ang móngdàn vdòng svng di daq lòng svng mvyà:ngò dv́ngte, kadø ínìgø mvshì long,” a:lòe.