Yeru angcèmè dvzū:nò we

Monday, July 08, 2019

Gvray mongka Tiq Tut Nvmlat Nvmpvng 28:10-22

Wekvt Yaku nø Beersheba rvgaq kèní búng nø, Haran rvgaq kaq svng dìá:mì. Iwe rvgaq tiqzàngø̄ tuqá:mì nìnø, nv̀m vlē daqì rvt, weyaq nø weyv́ng yøplv́m wáshì nø, wezàng kèní lóng tiq chv̀ng tǿò nø gō mvkø̄mshì sórí weyv́ngø yøpme. Wekvt a:ngí yøpnv́ng ná:ngò nø; taqlà, rvgaq taq vcaq nø, ang mvsóng nø muqlàng høqò we lv́ngdūn tiq lòng vdūn nø; ku, Gvray Ang muqlàng dvzv́rrì gø welòng taq rvlv́ng mv̄nshì yøt mv̄nshì we svng yà:ngòe. Ku, mvsóng yv́ngø Yehowa rip sórí kà shø̀n daqì nø, “Ngà nø nvkàng Abraham ang Gvray nvng Isak ang Gvray gø ǿngà pè Yehowa ǿngàe. Akvt nà èyøp we rvgaq yamóng nø Ngàí Nà svng gø, nà pvlí pvlaqrì svng gø zílv́m íe. Nà pvlí pvlaqrì gø rvgaq tø̀mò vbā dvtø̀l døni luq long nø, namaq nø nv̀mløp kaq gø, nv̀msv̄r kaq gø, tvnūgo kaq gø, tvnūni kaq gø nàshit nàzìng dv́rnønge. Rvgaq tø̀mò vsvng dvcìrì í dv́ngteí nø nà nvng nà pvlí pvlaqrì taqkèní ìshøt ìgv̀n lún dá:ròe. Eyà:ngò, nà kayv́ng èdi nìgø Ngà nø nà nvng v̄l nø, nà svng vcún vsòng sórí, yamóng svng nī nà kaq dvtv̀nglv́m íe. Kadø íe wa nìnø Ngàí nà svng dv́nòrì wá màdvgø:mò dv́ngte nø nà yv́ng kèní Ngà mvrv́lshø̀ng,” a:lòe. Wekvt Yaku nø yøp yv́ng kèní vshat lú:ngì kvt, “Jø̀ngjǿngni yazàngø nø Yehowa v̀l dá:rì we svng ngàí mvsháng dv́rà,” wae. Vrá ang svre lú:ngì nø, “Yazàng nø kadvngshìni vpǿ ring we rvgaq í ráì! Yayv́ng nø Gvray Ang chø̀m ni í dá:rì; yazàng nø muqlàng bv́ngkàchit í dá:rì màwá!” wae. Yaku nø sháng mvgágá kūngshì nø, ang vgo mvkømshi we lóng wechv̀ng svng tvróng dø ka:tnò nø ang mvsóng taq yøtìí vdø̄:ròe. Wezàng svng rá a:ngí Betel*, wa nø bø̀ng tǿ yà:ngà. Iwe, vzv̀ng dvgvp wewamà bø̀ng nø Luzi í yà:ngì. Wekvt Yaku dvgv́mshi nø shø̀n we nø, “Gvray nø ngà nvng v̄l nìnø, ngà akvt dø̄ng tvrà taq ngà svng nàcún nàsòng sórí ngà svng v́mlv́m shèv́m nø, gwálv́m dègwang nø; vrá ngà nø ngà vpè chø̀m svng pàmvrà vtv́ng lún bǿngò kvt kèní nø, Yehowa nø ngà Gvray gø èǿngange, wv̄nge. Vrá tvróng dø ngàí kvt bǿngà we lóng yachv̀ng nø Gvray chø̀m í dv̄re. Vrá Nàí ngà svng èzǿng dakngà we í dv́ngte taqkèní kadø ínìgø tiqcé wál tiqwál nø ngàí Nà svng zílv́m íe,” wae.

Mati 9:18-26

Kà yarì Yesuí angmaq svng shǿn mā:nò dvgvp, júrøt chø̀m øpshú tiq pè dì ráì nø, Ang mv́rdv̀ngø køt ngǿmshi noqò sórí, “Ngàcè mè nø akvtni shìá:mì; Nà èdi rā nø, Nà wūr ang mvdv̀m èhapshì kvt nø ang zūn longe,” a:lòe. Wervt Yesu tv̀m búng nø Ang coqcv́nrì nvng tiqdø wepè mèpvng cv̀n bǿà. Shvwi vyø̄ nø tiqcé vní nǿng zà daqì we svmaré tiq mè nø, Ang mèpvng lap kèní dì ráì weí, Ang mvdv̀m bèlaq dùng mvtú svng shu:pmòe. Kadø íe wani ang nø ang nøt taq, “Ngàí Ang bèlaq svng shup wa shupmònøng gø ngà bān longe,” wa kv́me. Iwe, Yesu wv́l poshì nø wemè svng yv̀ng bǿà kvt A:ngí, “Ngàcè mèá, shaqshaq wa èv̄l; nà kv́mnø:tní nà svng dèzǿm bǿì,” a:lòe. Svmaré mè nø welv̄ng ni zǿmá:mì.Yesu nø øpshú wepè chø̀m svng tuq ráì kvt, bishūn møtrì nvng vsvng loksok vhaqshì dā we svng yv̀ng bǿà kvt, A:ngí, “Eyilshìnøng; pawá wani svmasvré mè nø shì we mø̀í; yøp we lè íe,” a:lòe. Wervt angmaq nø Ang svng zērshi nø vhøòe. Inìgø vsvng loksokrì svng yīlshì dvzv́r bǿà dá:ngí, Ang gòngá:mì nø wemè wūr zø̀m bǿà nìnø, cv̀mré mè zūn lú:ngì. Wekvt shv̀ngkà welòng nø wemóng móngkøp svng vsherá:mì.