Yesuí Ang coqcv́nrì hí zá:lò we

Yesuí Ang coqcv́nrì hí zá:lò we

1 Shvle bóy shini mvpà:ngò vzv̀ng, Yesu nø rvgaq yalòng kèní búng nø Angpè yv́ng svng lolv́m rvtø̀ tuq ráì we sháshìe. Rvgaq tø̀mø vl we Angò rì svng A:ngí shù:ngò nø lv̀ngdø̀m

høq angmaq svng shù:ngò we A:ngí akvt dvta:nòe. a

2 Wedvgvp angmaq nø dørø̀m v́mpà v́mlv́m runge. Yesu svng nvmv́mlv́m nøt nø, Simon angcè Iskariot pè Yuda vdòng taq cá:ngí vzv́ngashaq íe. b

3 Wekvt Yesu nø, vl we í dv́ngte shvngbe nø Vpèí Ang wur taq vzíshaq í we nvng Ang nø Gvray yv́ng kèní dì daqì nø Gvray yv́ng svngni vtv́nglvm í we sháshì rvtnø; c

4 dørø̀m v́mpà v̄m yv́ng kèní tv̀mbúng nø, Ang belaq chutshi nø paqzit tiq dù:ngí Ang juq dvchvtshie. d

5 A:ngí kung tiq gø̀m taq tì zá:ngò dá:ngí Ang coqcv́nrì hí zv́laò nø Ang dvchvtshi we paqzit dù:ngí shøqāòe.

6 Simon Piter yv́ng høqa:tnà kvt wepèí, “Vkàngpèá, ngà hí svng Nàí zv́llv́m èwa ma?” a:lòe. e

7 Yesuí vtà:ngò nø, “Ngàí kapà wv̀ngò we akvt nàí mèsháò. Iwe tv́n mèpvng nø èshá lú:ngòe,” a:lòe.

8 Piterí Ang svng, “Kadø ínìgø ngà hí nø Nàí zv́l màdvzv́rshø̀ng,” a:lòe. Yesuí ang svng vtà:ngò nø, “Nà svng Ngàí hí mvzv́lnø̀ngnø, Ngà nvng nà nø pà vbamshì*lv́m màvl,” a:lòe. f

9 Simon Piterí Ang svng, “Vkàng pèá, í ni ngà hí wa mø̀í, ngà wur gø, vgo gø èzv́là,” a:lòe.

10 Yesuí ang svng, “Góng vzv́lshishaq gǿ nø, hí zv́lshì bø kvt nø góngkøp shèrv̄me. Namaq dvhø̀ kèní tiq gǿ wa mø̀íni shvngbe nø èshèrnø̀nge,” a:lòe. g

11 Kadø íe wani Ang kaq nvmv́mlv́m pè svng A:ngí sháòe. Wervt A:ngí, “Namaq dvhø̀ kèní tiq gǿ wa mø̀íni shvngbe nø èshèrnø̀nge,” a:lò we íe. h

12 Yesuí angmaq hí zv́l bǿà dá:ngí ang belaq gwashi nø vrá námrung bǿì dá:ngí angmaq svng, “Ngàí namaq svng kapà wáa bǿshà lòng èshánøng ma?

13 Namaqí Ngà svng, ‘Svrapè gø, Vkàngpè gø,’ èv̄lshàe. Namaqí wedø èvlshà lòng nø vdūe. Kadø íe wani Ngà nø wedøni ǿngàe. i

14 Ngà nø namaq nvkàngpè nvng svra pè ǿngà pèí dv́ng, namaq hí zá:lì nìnø, namaq gø welòng døni hí vzv́lké ràe. j

15 Pàwálv́m wani Ngàí namaq svng wáaì dø namaq gø cv̄nshìlv́m, namaq shvbóng shvmvtshirà Ngàí wáa bǿshà we íe. k