Yesuí coqcv́n tiqcé vní pè rvcà:ngò we

Marko 3:20-35

Wemèpvng angmaq nø chø̀m svng lò ráì nìnø, angmaqí v́mpà v́m gø mvlú:nò høq, vsvng loksok vrá tiq kvt kø̀m ráì.21 Ang rvp vsvng rìí yalòng tá bǿà kvt, “Ang nø nøt mvriqá:mì pà íe,” wa nø, Ang svng lùlv́m búngá:mì. k22 Yerusalem kèní dì daqì we dvrá svrarì nø, “Ang nø Beelzabul dvchøp rvtnø, cáng koqkv́mpè nònggùn kèní cángrì lù:ngò we íe,” wae. l23 Wervt Yesuí werì svng goò dá:ngí, kàshvbóng kèní A:ngí angmaq svng yadø a:lòe. “Satan svng nø Sataní kadøwa lúng sháòe ma?

 24 Móngdàn tiq lòng nø angmaq nø angmaq vpoke nìnø, wemóng nø dø̄ng ngv́ng mvlúnshì.25 Tiq chø̀m vsvng gø angmaq nø angmaq vpoke nìnø, wechø̀m dø̄ng ngv́ng mvlúnshì.26 Wedø tiqdvchá, Satan gø ang ni ang vtúshi sórí vpoke nìnø, ang gø dø̄ng ngv́ng mvlú:nò.27 Shvrē pè svng vzv̀ng màdóngshaq, ang chø̀m svng gòng nø kagǿí gø ang dvrè rì tø̄lv́m nø mvngutshi. Shvrē pè svng dóng dá:ngí wa ang chø̀m dvrè tø̄lv́m lúnshìe.28 Ngàí namaq svng v̄la:tnìni, Vsàngí vléò we mvrà nvng Gvray kaq shvyǿm mvtv́n we mvrà shvngbe nø chutna lúnshìe.29 Iwe, Shànshér Pvlàcè svng shvyǿ:mò gǿ svng nø kadø í nìgø chutna mvlúnshì. Wegǿ nø dvciq lvpat mvrà zìwvt vrīe,” a:lòe.30 A:ngí angmaq svng yadø a:lò we nø, “Ang nø mvmv́ng vcáng dvchøpme,” a:lò rvt íe.m

Kv́m vsvngrì nø Yesu angrì angrvp í we
31 Wedvgvp angmè nvng angnv̄m pèla dì ráì nø, chø̀m vngám lap yv́ng rip sórí, Yesu svng go dvzá:ròe. n
32 Vsvng loksokrì nø Ang gùrhøm runge. Vsvng rìí Ang svng, “Ku, nvmè nvng nvnvm pèlaí vngámlap yv́ng Nà svng èláe,” a:lòe.33 Wekvt A:ngí angmaq svng vtà:ngò nø, “Ngà vmè nvng vnvm rì nø kagǿ maq íe?” a:lò dá:ngí,34 Ang gùrhøm rung rì svng dvjaq sórí A:ngí rá, “Eyv̀ngnøng, ngà vmèmaq nvng Ngà vnvmrì!35 Gvray nøt cv́n dø̄ng we wegǿ mv̀ng nø Ngà vnvm rì nvng vmè íe,” a:lòe.