Yesu mv̀rshv̀m shø̀ngshang vmvtná:mìwe

Gvray Mongka Tiq Tut

SHVGÙN ZÀYWÀ BOK 96:1-2,5-6,9

Móng døngtáng cèrìé, Yehowa svng zàywà èwànø̀ng. Yehowa svng zàywà angshá:rí shètànøng.  Yehowa svng zàywà èwànø̀ng; ang bø̀ng svng shètànøng. Tiq ni nø tiq ni Ang chutchv́ng we jejú Dvbù shv̀ngkà dèshv̄ngnøng. Pàwálv́m wani vsvng dvcì rìí noqò we mvshá ìnvtrì í dv́ngte nø, pvrà hāng wa íe. Iwe, muqlàngrì pv́n yà:ngà pè nø Yehowa mv̀ng íe.  Pòngbàng shór we nvng rīng we koqkv́m dvgùng nø, Ang mv́rdv̀ngø v̄le. Shaq nònggùn jòr we nvng vnvp nø ngø̀r we gø Ang shànshérrà taq v̄le. Shanshér dø ègwāshìnø̀ng nø, Yehowa svng ènoqnøng. Móng døngtáng cèrìé, Ang mv́rdv̀ngø svre nàdv̀nnø̀ng.

Gvray Mongka V Ni Tut

2Peter 1:16-19

Nøngmaq Vkàngpè Yesu Kristu nø Ang jórnònggùn nvngnvng vtv́ng daq lòng dang namaq svng shá dvzv́r yv̀ngshà lòng nø, vsvng bv̄nya gvca:tní má:nò we mvshǿl mø̀í. Ang pòngbàng rīng vtv̄ng lòng nøngmaq nēí nī yv̀ng yv̀ngshà lòng dvshā:ngì we íe.  Kadø íe wani Ring vtv̄ng ngø̀rdvgùng vl pè yv́ng kèní kà tiq lòng būng daqì nø, “Ngà vtv̄ngshaq nøt shø̀m we Ngà Shóngshøng pè, Ngàcè pè nø yapè nī íe,” wa nø shø̀n daqì yv́ng kèní Ang nø Vpè Gvray yv́ng kèní vpǿ shvrīng daqà we nvng ngø̀rdvgùng gø vlúnshaq íe.  Rvhiqshaq shìgùng taq Ang nvng tiqdø à:lì dvgvp, muqlàng kèní shø̀n daqì we kà yalòng nø nøngmaq vnàí nī tá yv̀ngshà. Wervtnø̀ yarì taqkèní nī kàdvtutshúri kà nø nøngmaq dvpvt té wa kv́m dø̄ngv́mshà. Namaqí gø kà yarì svng cv́n èdøngnøng. Kà yarì nø namaq nøt taq vsháng gá ra høq dø̄ vdòngø vwanā we gálòng nvng sháng kùrbù chv̀ng svr ra høq dø̄ vdòngø dvgáa we svmi gwìn rvcí íe.

Luka 9:28-36

Yesuí kà yarì shøn bǿà mèpvng tvné vshvt ni taq, A:ngí Piter, Yohan nvng Yaku svng shø:lò nø, vjúrøtlv́m dvpvt shìgùng svng rvlv̀ngá:mì.  Ang júrøt dvgvp, Ang mv̀rshv̀m shøt vlíng lú:ngì nø, Ang belaq gø múng dv̀ngwa kvlàng lú:ngì.  Moshi nvng Eliya gø brìmbrìm shór vdòngø Yesu nvng rip nø,  angmaq nø Yerusalemø Yesu shì nø wá dvdv́nglv́m rì dang dvmv̀ne.  Piter nvng ang rv̀mnvng pèní nø yøpyǿ vngø̄mshi yv́ng kèní pán vshat ráì nìnø, Yesu nø brìmbrìm shór we nvng Ang ó rip we vsvng vní gǿ gø angmaqí yv̀ng bǿà.  Vsvng wepèní nø Yesu yv́ng kèní vtv́nglvm dv́nshi lā:ngí, Yesu svng Piterí a:lò we nø, “Svra pèá, yayv́ng nø nøngmaq dvpvt v́l shvlá dá:rì; shìyat vshø̀m lòng wá dèzv́rshà, Nà dvpvt tiq long, Moshi dvpvt tiq long, Eliya dvpvt tiq long, wàa:tnìni,” a:lòe. (Iwe a:ngí shø̀:nò kà svng ang mvdǿmshì.)  Ang yadø shø̀n la:ngí ni rvmøt tiq pù būng lú:ngì weí angmaq svng dvkøq daqà. Rvmø:tní wv̄mke bǿà rvt angmaq svrēe. Wekvt rvmøt vdòng kèní kà tiq lòng shø̀n daqì nø, “Yapè nø Ngàí Rvcv́ngshaq pè, Ngàcè pè íe; namaq Ang kà ètánøng,” wae. q 36 Kà welòng vtv̄ngá:mì dvgvp, Yesu Ang wawa v̄l we yà:ngòe. Wenila taq wepèla nø dø màwá v̄l nø, yv̀ng bǿà rì nø tiq gǿ svng gø màdvtáò.