Yesu nø gø̀nshaq zidòng í we

Yesu nø gø̀nshaq zidòng í we

22 Mèpvng ni taq, tìnúng kupaø ngø̀ma:pmì vsvng loksok mvdòí nø, weyv́ngø kùngshí tiq gø̀m wa mø̀í nìnø dvgá kùngshí màv̀lap we nvng kùngshí wegø̀m taq Yesu nø mvzv́ngshì, Ang coqcv́nrì wa zv́ngshìa:pmì we svng dǿm bǿà. 23 Wekvt Tiberia kèní di ráì we kùngshí tiqmaq nø, Vkàngpèí Gvray kaq oqà wa dá:ngí angmaq zidòng v́ma:pmì zàng shvnvng yv́ngø koqshi ráì. g 24 Vsvng loksokrìí nø, Yesu gø, Ang coqcv́nrì gø weyv́ngø màvl we svng dǿm bǿà kvt, angmaq gø kùngshí we rì taq zv́ngshì nø, Kapernum pa svng Yesu láa:tnà. 25 Tìnúng kupaø angmaqí Ang svng lá lún bǿà nìnø, “Rabbiá, Nà nø ya yv́ng svng kadvgvp ètuqa:pmì?” wa rø:tnòe.

26 Yesuí angmaq svng vtà:ngò nø, “Ngàí angjǿng dìng dø v̄la:tnìni, namaqí Ngà svng èlásha long nø, shálv́m mvshv́lpvrárì èyv̀ngvpshà rvt mø̀í, zidù:ngí nàgàvpshà rvt mv̀ng íe. 27 Gvyaq mv̄nshì we v́mlv́m dvpvt wa mèdèzaqshìnø̀ngni. Vsvng Angcè pèí namaq svng zí daqì we, dvciq lvpat gø̀nshaq høq zá:nò we v́mlv́m svng mv̀ng lá dèzaqshinøng. Kadø íe wani Vpè Gvrayí ni Ang taq Angò dvzøk dvcaqshaq íe,” a:lòe. h 28 Wervt angmaqí Ang svng, “Nøngmaqí Gvray bv̀nlì wá lúnlv́m dvpvt kapà wa ráìe ma?” a:lòe. 29 Yesuí angmaq svng, “Gvray bv̀nlì nø, A:ngí dvzv́r daqà pè svng namaqí kv́mlv́m lòng yalòng íe,” a:lòe.