Yesu svng ngórdor cìí vdø̄:rò we

Yohan 12: 1-11

Yesu nø, Shvle bóy mvhøqò vzv̀ng vchuq ni taq A:ngí shi yv́ng kèní dvzuna:pmà pè Lazaru vl we Betani rvwá svng tuq ráì. ab 2 Wekvt angmaqí Ang dvpvt dørø̀m v́mpà dvgǿaò nø, Martaí dvzø:mòe. Ang nvng tiqdø v́mpà v́mlv́m námrung rì taq Lazaru gø vbáe. c 3 Wekvt Marií nø, vtv̄ng kèní vpǿ nø nardú mvdø̀ng ngódorcì tiq dvláng lùò nø, Yesu hí vdø̄:rò dá:ngí, ang vgonií shøqāòe. Wekvt nø welòng ngódorcì dor weí chø̀mkøp taq zø̀ngá:mì. d 4 Iwe mèpvng Ang svng nvmvmlv́m pè, Ang coqcv́n Iskariot pè Yuda nø yadø wae, 5 “Ngórdorcì yalòng nø gv̀msùng vshø̀myá gø̀m* taq nvmdv̀ng dvshà vsvng kaq zílv́m pàwá mvwàò ma?” wae. 6 Ang yadø shø̀n kà nø dvshà vsvng kaq à:ngí nøtnaò rvt mø̀í. Ang nø gv̀msùng yǿng rvdashú í nø weyv́ng kèní kǿ mū:nò pè í rvtnø wa we íe. e 7 Wervtnø̀ Yesuí, “Mènàgámni; Ngà svng kǿmlv́m ni dvpvt à:ngí ngórcì yalòng gà:lò we íe. 8 Dvshà vsvng rì nø namaq nvng kadvgvp gø v̄le. Ngà nø namaq nvng kadvgvp gø vl we mø̀í,” a:lòe. f 9 Yesu Betani yv́ng vl we svng Yuda vsvng rì loksu:kngí shá bǿà. Wekvt angmaq nø Yesu rvtnø wa mø̀í dø, A:ngí shì yv́ng kèní dvzuna:pmà pè Lazaru svng gø yv́ng lúnlv́m dvpvt di ráì. 10 Iwe shvrúngshú vjìrì nø Lazaru svng gø shvtlv́m dvpvt vrāshìe. 11 Kadø íe wani Lazaru rvtnø Yuda vsvng rì mvme nø angmaq kèní rv́lshì nø Yesu svng kv́m mvnshìe.