Yesu svng shvtlv́m vrashi we

Yesu svng shvtlv́m vrashi we

1 Shvle Bóy nvng Zidòngsér Vmbóy vzv̀ng vní ni taq, shvrúngshú vjìrì nvng dvrá svra mvdò rìí nø Yesu svng mvyø̀:ní tvp nø shvtlv́m gvcvt vjø:nòe. a 2 Wedø ínìgø angmaq nø bashà rì vjángshi long we svng svre rvt, bóy angni taq nø laq mø̀í, wa vrāshìe. 3 Yesu nø Betani mvrìng yv́ng mv̄nggv̄ng vcaq yà:ngì pè Simon chø̀m taq v́mpà vm nø námrung dvgvp, svmaré tiq mè nø, gvzà vpǿ we nardú ngódorcì zvng we lóngshú chúng tiq lòng lá:ngò nø gòng ráì. Lóngshú chúng long a:ngí pú:ngò nø, Yesu vgo taq vdø̄raòe. bc 4 Iwe, weyv́ng rung rì tiqmaq nø wedø wàò lòng svng mvwv́mshì nø, “Ngórdor cì welòng nø, mvpápá pàwá dvsǿ:mò ma? 5 Pàwá wani welòng nø vshø̀myá Dinari mvdv̀m nvmdv̀ng mvshámhoq dvshà vsvngrì dèba:ngò lòng nø té shvla we!” wa nø vbønshie. Wervt angmaqí wemè svng her wa nga:nòe. 6 Iwe Yesuí a:lò we nø, “Vwa laq wàò, A:ngí Ngà dvpvt shvla we tiq pv̀n èwv́ngang ke pàwá ang svng nàgámnønge? 7 Kadø íe wani mvshámhoq dvshà rì nø kadvgvp gø namaq nvng tiqdø v̄le. Namaqí angmaq svng dvbvng mèyǿnøng nìnø kadvgvp gø dvbvng dv̀ng íe. Inìgø, Ngà nø namaq nvng tiqdø yv̀ng màdvt v̀llv́m mvǿngà. d 8 A:ngí wá lú:nò dv́ngte wà bǿà. Ngà svng mèkǿm vzv̀ng kaq Ngà góng taq yøtìí nàdø̄r we nø Ngà svng kǿmlv́m dvpvt dvgø̀ò we íe. 9 Ngàí namaq svng jø̀ngjǿng v̄la:tnìni, móng døngtáng taq Dvbùshv̀ngkà yalòng kayv́ng høq dvshvng bǿò nìnø weyv́ng høq, svmaré yamèí wà bǿà we yalòng svng gø dvdv̄m rǿnlvm wedøni dvshvng dá:ròe,” a:lòe. Yudaí Yesu nv̄mlv́m búngá:mì we 10 Tiqcé vní pè kèní Iskariot vsvng Yuda nø, shvrúngshú vjìrì wur taq Yesu nv̄mvmlv́m dìá:mì. e 11 Yudaí shø̀:nò kà werìí tá bǿà nìnø, dvbùá:mì nø ang svng gv̀msùng zílv́m dv́nāòe. Weyv́ng kèní Yudaí nø, angmaq wur svng kadøwa Yesu tvle lúnlv́m, yuqyà ra we rvtø̀ láòe. Shvlē Bóy v́mrà láò we 12 Shvlé bóy núngpà shvrúnglv́m vyv̀ngcè sha:tnò we, Zidòngsér Vmbóy nv̀mlat ni taq, Ang coqcv́nrìí Ang svng, “Shvle Bóy v́mpà v́mlv́m nøngmaqí kayv́ng dvgǿalv́m Nà èshònge ma?” wa rø:tnòe. f 13 Wekvt A:ngí coqcv́n vní pè dvzá:rò nø yadø a:lòe. “Wamà svng èdìv́mshi nø, vbachúng taq tì baqshi we vsvng tiq gǿ nàhǿm bǿshòe. Ang mèpvng ècv̀n bǿshò. 14 Ang kayv́ng gòngvm nìnø wechø̀m angkàng pè svng, ‘Vkàng pèí, “Ngà coqcv́nrì nvng tiqdø Shvle Bóy v́mpà Ngà v́m lúnlv́m, zaqlè dǿng kayv́ng íe?” wa røtne,’ èv̄lshò. g 15 Wekvt dvzøm dvzi dvgǿshaq í we mvdv̀m dvtv̀ng taq, te we tiq dǿng a:ngí nàní lvngà svng dètānvtshìe. Nøngmaq dvpvt weyv́ngø dègø̀ dáshò,” a:lòe.