Yesu zun lú:ngì we

Monday, July 22, 2019

Gvray Mongka Tiq Tut BÚNGÁM 14:5-18

Farao nvng ang dvzømshúrì nø Israel bashà rì dāng nøt shv́l vpoá:mì nø yadø wae: “Nøngmaq svng dèzø̄:mì yv́ng kèní Israel dvcì cèrì svng shvlà:ngì we yalòng nø, nøngmaqí pà wàì we íe?” wà lú:ngì. Wervt Faraoí ang cìlgàrìrì dvgø̀ò dá:ngí, ang cìldø̀ngrì shø̄:lò nø tv̀m búngá:mì. Ang nø rvcv́ngshaq cìlgàrì vchuq yá nvng Ejip móng taq v̄l we cìlgàrì shvngbe taq cìldùrì zúnshì dvzá:rò nø dìá:mì. Israel dvcì cèrì nø nvrø̀m dvtéshì taqsórí dí mv̄nshì ke, Yehowaí Ejip móng koqkv́m Farao svng nøt zaq dvzá:rò nø, a:ngí Israel dvcì cèrì svng yera:tnà. Wedøni Faraoí nø ang cìlgø̀mrang mvdò nvng cìlgàrìrì, cìldøngrì nvng cìlgø̀mrang zún shvrē mvdò shvngbe tvpwa shø̄:lò weí, angmaq svng yer bǿà nìnø, Pihahirot shvnvng Balzefon tvnu dāng, tìnúng shvnvng yv́ng zóng kupshi nø vl dā we Israel bashà rì svng zíkéa:tnà. Farao nvng Ejip cìldø̀ngrì vyv̀n ráì weí angmaq kaq yera:tnà we svng Israel dvcì cèrìí yv̀ng bǿà kvt, vtv̄ngshaq svre vnv́n lú:ngì nø, Yehowa svng vkiq nø røtshìe. Wekvt angmaq nø Moshi svng, “Ejip móng taq dvgv̀m màvl rvtnø, zømwàng móng taq nøngmaq svng dvshílv́m èshølvtshà we íe ma? Ejip móng kèní nøngmaq svng nàgùngvtshà we yalòng nø, nàí pà dvrà èwàò we íe?” Nøngmaq nø Ejip móng taq nà svng, “‘Ejip vsvng rì vshuq vwā laq íshà, nøngmaq svng èlàngshà,’ wàì nø shønvpshà we mø̀í ma? Pàwálv́m wani zømwàngø shìlv́m tvle nø Ejip vsvng rì shuq wáshàì lòng té súme,” a:lòe. Inìgø Moshií bashà rì svng, “Mèsèrenøngni. Ripdv̀ng èwànø̀ng nø, Yehowa A:ngí dèni namaq dvpvt wà daqò we chutchv́ng bv̀nlì svng ècānøng. Kadø íe wani, dèni namaqí èyv̀ng bǿshà we Ejip vsvng yarì nø, akvt kèní kukaq namaqí kadvgvp gø mèyv̀ng lóngnøng. Yehowaí namaq dvpvt cìl nàtúā daqnø̀nge. Namaq nø shoq màwá v́ldv̀ng èwànø̀ng,” a:lòe. j 15 Wekvt Yehowaí Moshi svng, “Nàí Ngà svng pawá ègōngàe? Israel cèrì svng dí mv̄nshì dèzá:rò. Nàí mv̀ng nø nà dvrv̀ng tv̀ng èhà:ngò nø, tìnúng mvdv̀m nà wur èhángshì weí tìnúng svng vwálshì dèzá:rò. Wekvt Israel cèrìí nø, tìnúng dvhø̀hø̀ bv̀ngshú mvdv̀m dī sórí léshì lún lú:ngòe. Eyà:ngò, Ngàí nø Ejip vsvng rì svng nøt zaq dvzv́rò nø, angmaqí Israel cèrì svng yera:tnòe. Wekvt Farao nvng ang cìldø̀ngrì shvngbe, ang cìlgàrìrì nvng ang cìlgø̀mrang mvdò shvngbe taqkèní Ngàí dvgùng lún lóngòe. Farao nvng ang cìlgàrìrì, ang cìlgø̀mrang zún shvrērì taqkèní Ngàí dvgùng lún bǿngò kvtnø, Ngà nø Yehowa ǿngà we svng Ejip vsvng rìí èsháng longe,” a:lòe.

Yohan 20:1-2,11-18

Wenár nv̀mlat ni taq, shini mvgá dvgvp, Makdala Mari nø lóngdùng dvgv̀m yv́ng svng sháng mvgágá dìá:mì kvt, dvgv̀m shø̄ lóng gø̀m vlúshaq í da we svng yv̀ng bǿà. Wervt ang kvlv̀ngá:mì nø, Simon Piter nvng Yesu shóngshì we coqcv́n pè yv́ng svng tuq ráì nø, “Dvgv̀m kèní angmaqí Vkàngpè svng lùa:pmà, kayv́ng gv̀la:pmà we nøngmaqí mvsháì,” wa angni lvngà svng dvtáòeMari nø lóngdùng dvgv̀m vdàm lapmø rip nø ngø̄e. Ang wedø ngø sórí ngúshì nø dvgv̀m vdòng svng dvjaqò nìnø, Yesu vnàng vyàla:pmà yv́ngø, belaq mùng gwashi we muqlàng dvzv́r vní gǿ nø, vgo lap tiq gǿ, hí lap tiq gǿ rung we svng yà:ngòe. Wegǿ níí ang svng, “Svmaré mèá, pàwá èngøe?” a:lòe. A:ngí angni svng, “Ngà Vkàngpè angmaqí baqò nø kayv́ng gv̀la:pmà we mvshángò rvt ngønge,” a:lòe. Wedø shø̀n dá:ngí ang lv́mposhì nìnø, Yesu weyv́ng rip we svng yv̀ng bǿà. Inìgø Yesu í we svng màmvshá:lò. Yesuí, “Svmaré mèá, pàwá èngøe? Nàí kagǿ svng èláòe?” a:lòe. Marií wepè nø kùlwàng vsòngpè íe lá:nò nø Ang svng, “Vshaq pèá, nàí Ang svng èbaqa:pmà nìnø, kayv́ng nàyàla:pmà we dètángà, ngàí baqlv́m íe,” a:lòe. 16 Yesuí ang svng, “Mariá,” a:lòe. Ang lv́mposhi taqsórí Hebru kàí Ang svng, “Raboni,” a:lòe. Yakà nø, Svra pè, wa kà íe. Yesuí ang svng, “Ngà svng mèzø̀mànøng; kadø íe wani Ngà nø Vpè yv́ng svng shini màrvlv́ngshaq ǿngàe. Iwe Ngà vnvmrì svng èdivm nø angmaq svng, ‘Ngà nø, Ngà Vpè nvng namaq Angpè, Ngà Gvray nvng namaq Gvray yv́ng svng rvlv̀ngvme wae,’ èvlá:mò,” a:lòe. Makdala Mari di ráì nø coqcv́nrì svng, Vkàngpè svng ngàí yv̀ng bǿngà, a:lòe. Vrá, A:ngí ang svng vl dá:ràrì shvngbe dvtáòe.