Yohan coqcv́nrìí Yesu svng røtna:tnà we

Wekvt Yosep svng mvsháò we koqkv́m angshv́r tiq pè Ejip móng taq bung lú:ngì. A:ngí ang bashà rì svng a:lò we nø, “Eyv̀ngnøng, Israel dvcì cèrì nø nøngmaq mvdv̀m té luq nø nònggùn té kv́ng lú:ngì.  Ló, angmaq svng bvnyāí móì. Mø̀íni, angmaq nø dvshàshà vzìng long nø mvzàn lā būng rā nìnø, nøngmaq nvng ngv̀nshà írì lap svng angmaq gø dvcaqshì nø nøngmaq svng èsha:tnì dá:ngí yamóng kèní angmaq vtshìv̄m we màshá,” wae.  Wedø í rvtnø, Ejip vsvng rìí vtv̄ngshaq vlīshì we bv̀nlì wá shvnv́ng weí Israel dvcì svng dvkilv́m dvpvt, angmaq mvdv̀mø vshuq øpshúrì zá:ngò nø, Farao koqkv́m dvpvt dvrè shøprà, Pitom nvng Ramase wamàní vrv̄ng dvzá:ròe.  Wedø ínìgø Israel dvcì cèrì nø, Ejip vsvng rìí dvshà dvkiò dvshà luq nø vzíng mv̄nshì lú:ngì rvt, angmaq nø Israel dvcì cèrì svng svre lú:ngì. Wervtnø̀, Ejip vsvng rìí Israel dvcì cèrì svng mvhø̀ mvhut vrè dvkiòe.  Vrá, wv̀mjip wàlv́m wv̀m vcha:nò nø barut shà:lò we bv̀nlìrì nvng rvmá tvmu wá dvzá:rò nø, rvzaq bv̀nlì rìí angmaq lvpat svng shàngré dvzá:ròe. Angmaq svng wá dvzá:rò we bv̀nlì í dv́ngte taq vtvngshaq mvhø̀ mvhut dvkiòe. Wekvt Faraoí ang bashà rì svng dvká:mò nø, “Hebru vsvng rìí gv̀l daqò we lvngàsvrécè í dv́ngte svng nø namaqí Nil rvmè svng gùr ràe; svma svré í dv́ngte svng mv̀ng nø cúnshì dèzv́rānøng,” a:lòe

 

 

Luka 10:34-11:1

Rvgaq tø̀m svng Ngàí mòng dvzø̀llv́m lòng èlv́nga daqshà mèlv́nnø̀ngni. Ngà nø mòng dvzø̀llv́m dvpvt dø̀ng dakngà we mø̀í; shv̀mshvnaq lv́ng dakngà we mv̀ng íe. Kadø íe wani Ngà nø, angcè nvng angpè, angcèmè nvng angmè, angshv̀ngmè nvng angnìmè gv̀ng vkàng dvzv́rlv́m dvpvt lè dø̀ng dakngà we íe.Vdè svng ngv̀nshà wáshì rì nø, vdè rvp rì ni í longe.  Ngà svng èshòng mvdv̀mø angpè angmè svng té shóngshì gǿ nø Ngàò í màpǿ. Ngà svng èshòng mvdv̀mø angcè lvngà shvdv̀ng, zvmì shvdv̀ng svng té shóngshì gǿ gø Ngàò í màpǿ. Vdè wurgang baqshi sórí Ngà mèpvng mvcv̀n gǿ gø, Ngàò í màpǿ.  Vdè gø̀nshaq svng mvpáshi gǿ nø, ang gø̀nshaq vmvngv̄me. Ngà dvpvt rvtnø ang gø̀nshaq sǿmv̄m gǿí mv̀ng nø, gø̀nshaq lá lúnlv́m íe. Namaq svng nàtōnøng gǿ a:ngí nø, Ngà svng nàtòng we íe. Ngà svng nàtòng gǿ a:ngí nø, Ngà kaq dèzv́r dakngà pè Ang svng vtōò we íe. Kàdvtutshú gǿ svng vtōò gǿ a:ngí nø, kàdvtutshúí lú:nò we zìbè lún lú:ngòe. Døngman vsvng kaq vtōò gǿ a:ngí gø, døngman vsa:ngí lú:nò we zìbè lún lú:ngòe. Ngàí v̄la:tnìni, Ngàò coqcv́ncè yarì taqkèní cv́m vtv̄ng gǿ svng tìgwit tiq gwìncè wa shvaqò gǿ gø ang zìbè màmv́ngaò,” a:lòe.