Yohan coqcv́nrìí Yesu svng røtna:tnà we

Luka 7: 18-23

18 Yohan coqcv́nrìí yadv́ng pv̀n shvngbe Yohan svng dvtáòe. f 19 Wekvt Yohaní coqcv́n vní pè goa:tnà nø Vkàngpè yv́ng svng dvzá:rò sórí, “Dìlv́m vdv́nshaq pè nø Nà èí ma? Mø̀íni nøngmaqí dvgá tiq pè svng cāì ni ma?” wa nø røt dvzá:ròe. g 20 Wepè ní Yesu yv́ng tuq ráì kvt, “Tiløp Yohaní ngàní lvngà Nà yv́ng svng dèzv́rshi nø, ‘Dìlv́m vdv́nshaq pè nø Nà èí ma? Mø̀ínī nøngmaqí dvgá tiq pè svng cāì nī ma?’ wa røt dèzv́rshìe,” a:lòe.

21 Wervtø̀ taq vnā zø̀nlì angpv̀npà:ní zā vsvng nvng cáng mvgv́m dvchøp vsvng mvme kaq Yesuí dvbānaòe. Nemàn mvme gǿ svng gø A:ngí yvngshi dvzá:ròe. 22 Wervtnø̀ A:ngí angní lvngà svng vtá:nò nø, “Nàtv́ngv́mshi nø nàníí èyv̀ng bǿshà we nvng ètá bǿshà we, nemàn rìí vrá yv́ng lú:nò nø, hízē rìí nø vrá dí lú:nò we; mvnggv̄ng rì dvshér lú:nò we; nàmvtá rìí vrá tá lú:nò we; shì vsvngrì dvzū:nò we nvng mvshámhoq dvshà rì svng gø Dvbùshv̀ngkà dvshvngāò we tá lú:nòe, wa Yohan svng dètásho. h 23 Ngà rvtnø nøt vtøp we màvl gǿ mv̀ng nø ìshøt ìgv̀n lúne,” a:lòe.