Yuda vsvng rìí Yesu svng ngá:lò we

Yohan 10:31-42

Yuda vsvng rìí vrá tiq kvt Ang svng wvplv́m lóng tǿòe. u 32 Yesuí angmaq svng, “Vpè kèní bv̀nlì shvlá mvme Ngàí namaq svng dvtana bǿshà. Bv̀nlì yarì taqkèní kalòng rvtnø Ngà svng lú:ngí wvplv́m èdv́nshà ma?” a:lòe. 33 Yuda vsvng rìí vtá:nò nø, “Bv̀nlì shvlá rvtnø nà svng wvplv́m dá:nì we nø mø̀í; Nà nø shǿn màdu kà èshø̀n nø, Nà nø vsvng ni èí ke, vdè nø Gvray í ra dø èshǿnshì weí Gvray kaq shvyǿm kà èshø̀n rvt íe,” a:lòe. v 34 Yesuí angmaq svng vtá:nò nø, “‘Namaq nø dvmø̀rì èínønge, wvng nø vl bǿngà,’ wa nø namaq Dvrá lèga taq ni màru ma? w 35 Shànshér Kàru nø dìng we nøngmaqí sháìe. Gvray Mòngkà vzíshaq rì svng A:ngí, ‘Dvmø̀rì,’ v̄l yà:ngà nìnø; x 36 Vpèí shànshér dø shègak nø rvgaq tø̀m svng dèzv́r dakngà pè Ngàí, Ngà nø Gvray Angcè pè ǿngàe, wvng shǿnshø̀ng rvt namaqí nø, ‘Nà nø Gvray kaq shvyǿm kà èshø̀ne,’ wa pàwá èzershàe? y 37 Ngà Vpè bv̀nlì mvwv̀ngò kvt kèní nø, Ngà svng mèkv́mnøngni. 38 Ngàí Ang bv̀nlì wv̀ngò we ni í kvt kèní nø, Ngà svng mèkv́mnøng nìgø vtiqlv́m bv̀nlì yarì svng dvbvng èkv́mnøng lè! Weyv́ng kèní Vpè nø Ngà vdòng taq vl nø, Ngà gø Vpè vdòng taq vl we svng namaqí èshá bǿnøng nø ècíng lóngnønge,” a:lòe. 39 Angmaqí vrá Ang svng tvplv́m wàò we Ang nø angmaq yv́ng kèní léshìá:mì. z 40 Ang nø Yordan tì kupa, Yohaní nv̀mlat tìløp løpma yà:ngà yv́ng svng tuqá:mì nø weyv́ngø v̀lá:mì. a 41 Wekvt Ang yv́ng vsvng mvme dì ráì nø, “Yohaní nø jø̀ngjǿng pà shálv́m mvshv́lpvrá gø mvwàò we; yapè dang à:ngí shø̀n yà:ngà dv́ngte shvngbe nø dìng dá:rì,” wae. 42 Weyv́ngø vsvng mvme Ang svng kv́m bǿì.