Zakiu nøt vwv́ngshì ráì we

Zakiu nøt vwv́ngshì ráì we

1 Yesu nø Yeriko mvrìng svng gòng nø chàng vlēe. 2 Zakiu, wa tǿò we kùyà gúnshú vjì mvgàm tiq pè gø weyv́ng v̄le. 3 Yesu kagǿ í we svng ang yv́ng mvyǿ we, góng tø̀ weí, vsvng loksokrìí dvkøqò rvtnø yv́ng mvlú:nò. 4 Wervt ang nø vzv̀ng kaq Yesu dìlv́m dv́nshi dāng svng kvlv̀ngá:mì nø, Ang svng yv́ng lúnlv́m dvpvt nv̀mgwè tiq tø̀ng svng rvlv̀ngá:mì. 5 Yesu weyv́ng tuq ráì kvt, kāngngángshì yà:ngò nø ang svng, “Zakiuá, bò èlāshì daq; pawá wani dèni Ngà nø nà chø̀mø̄ v́l rànge,” a:lòe. 6 Wekvt ang cancan lāshì daqì nø, shaqshaqwa Yesu svng vtoòe. 7 Welòng svng yv̀ng bǿà kvt vsvng shvngbe nø, “Ang nø mvrà v̄l vsvng we pè chø̀m taq yøpmá:mì,” wa vbø̄nshie. a 8 Zakiu nø zv̄ng rip dá:ngí Vkàngpè svng a:lò we nø, “Eyà:ngò, Vkàngpèá, ngà dvzø̄m dvzi vdáng rì nø, tiq kā høq mvshámhoq dvshà rì kaq ngàí zílv́m íe; vrá ngàí kagǿ svng pà tiq pv̀n vmupmv́m bǿngànøng nø, vbì dvtv̀ng tvlē vtv́ngāngòe,” a:lòe. b 9 Yesuí ang svng, “Chutchv́ng jejú nø dèni yachø̀m taq tuq daqì. Kadø íe wani ang gø Abraham pvlí pvlaq tiq pè ni íe. c 10 Pàwálv́m wani Vsvng Angcè pè nø vmvng rì svng lá nø chutchv́nglv́m dvpvt dì daqì,” a:lòe.