Nemàn vní gǿ dvbā:nò we

Mati 9:27-31

Nemàn vní gǿ dvbā:nò we

27 Yesu nø weyv́ng kèní búngá:mì ke, nemàn vní gǿí vkiq sórí Ang mèpvng cv̀na:tnà nø, “Dawi pvlí pvlaq pèé, dvshá èzashàé,” wae. 28 Yesu nø chø̀m svng gòngá:mì mèpvng, nemàn pèní gø Ang yv́ng svng dì ráì kvt, Yesuí angní svng, “Yalòng Ngàí wá dá:ngòe, wa nø èkv́mshìe ma?” wa rø:tnòe. Angní lvngàí Ang svng, “Vkàngpèá, kv́mshìe,” wa vtá:nòe.

29 Wekvt angní lvngà nē svng A:ngí shu:pmò sórí, “Nàní lvngà èkv́mshì dø tiqdvchá nàní dvpvt leqíā daqshì,” a:lòe. o 30 Wekvt angní lvngà nēí yv̀ng lú:ngà. Yesuí angní lvngà svng gvpnaq dvká:mò nø, “Yadø èbanv́mshà tvrà kagǿ svng gø shǿn mvdaqé,” a:lòe. p 31 Iwe angní búngá:mì nø, wemóng móngkøp taq Ang dvgùng dvshv̄ng bǿà.