Dvsháza bv̀nlì rvt màdvshv́ngshìlv́m

Dvsháza bv̀nlì rvt màdvshv́ngshìlv́m

1 Namaqí shvla we bv̀nlì èwànø̀ng ke vsvng mv́rdv̀ngø dvgùng lúnlv́m rvt èwànø̀ng we laq mø̀í. Wedø èwànø̀ng nìnø muqlàng taqlap vl pè namaq Nvpè yv́ngø namaq zìbè pà gø mèv́lā dánøng. 2 Wervtnø̀ namaqí dvsházā bv̀nlì èwànø̀ng dvgvp, vsa:ngí lashvring ra dø nøt vnínøt cv̀n vsvngrìí júrøt chø̀m rvgaq nvng mvrìng tvrà rvgaqgaq, bochē mø:tnò dø nø mèwànøngni. Ngàí namaq svng v̄la:tnìni, wedø wàòrìí nø angmaq zìbè pvtbe lúnv̄m bǿà. 3 Iwe, nàí dvsházā bv̀nlì èwàò dvgvp, nà vbàng wū:rí èwàò lòng nø nà vgwé wū:rí laq mvsháò. a 4 Wekvt mvyø̀n pv̄ngø wàò rì svng yà:ngò pè Nvpè A:ngí nà svng zìbè nàwv́ngā daqe. Júrøt we taq màshvringshìlv́m 5 Namaq vjú èrøtnø̀ng dvgvp, nøt vní shvlē cv̀nrì dø mèwáshì nø̀ngni. Angmaq nø vsa:ngí lvyv̀ng rā dø júrøt chø̀m rvgaq nvng tvrà nv̄mdø̄ng rvgaqø rip sórí júrøt mvyǿe. Ngàí namaq svng v̄la:tnìni, wedø wa rìí nø angmaq zìbè pvtbe lúnv́m bǿà. b 6 Namaq vjú èrøtnø̀ng dvgvp, kok vdòng svng ègòngnø̀ng nø bv́ngkà ècøtshinø̀ng dá:ngí, mvyø̀n vdòngø v̄l pè Nvpè svng vjú èrøtshìnøng. Wekvt mvyø̀n pv̄ngø yà:ngò pè Nvpè A:ngí namaq svng zìbè nàwv́ngā daqnø̀nge.

Vmpà màv́m vnatshì dang 16 Namaq v́mpà màv́m nànatshi daqnø̀ng dvgvp, nøt vní shvlē cv̀n vsvng wáshì dø, rvyù mv̀rshv̀m mèrínøngni. Angmaq nø màv́mv́m vnatshi we svng vsa:ngí lvyà:ngò dø, angmaq mv̀rshv̀m chū rvyù dø wáshìe. Ngàí namaq svng v̄la:tnìni, angmaqí nø angmaq zìbè pvtbe lúnv́m bǿà. k 17 Namaq mv̀ng nø, v́mpà màv́m nànatshi daqnø̀ng dvgvp, namaq vgo gø shúí èmatshìnø̀ng; mv́r gø èzv́lshìnøng. 18 Namaq v́mpà màv́m nànatshìnøng lòng nø, vsa:ngí mvyà:ngò nìgø mvyø̀n vdòngø vl pè Nvpèí yà:ngòe. Wervt mvyø̀n pv̄ngø yà:ngò pè Nvpè A:ngí namaq svng zìbè nàwv́ngā daqnø̀nge.