Yesuí vjúrø:tnò we

Yesuí vjúrø:tnò we

1 Yesuí yadv́ng pv̀n shø̀:nò dá:ngí, muqlàng kaq dvjaq sórí yadø wae. “Vpèá, rvtø̀ nø tuq ráì. Nvcèpè Ngàí Nà ngø̀r dvgùng shvring lúnlv́m dvpvt Nvcèpè ngø̀r dvgùng shèring dakngà. a 2 Kadø íe wani Nàí Ang svng vzíshaq rì shvngbe svng, dvciq lvpat gø̀nshaq zílv́m dvpvt, Nàí nø vsvng shvngbe mvdv̀m vmíng vkv́ng Ang svng èzí yà:ngà. b 3 Tiq gǿ wa èí pè Gvray mvdø̀ng Nà svng gø, Nàí dèzv́r daqà we Kristu í pè Yesu svng gø sháò lòng nø, dvciq lvpat gø̀nshaq íe. c 4 Nàí Ngà svng èzǿngà bv̀nlì Ngàí wá dvdv́ng bǿngà lù:ngí rvgaq tø̀mø Nà ngø̀r dvgùng Ngàí shvring bǿngà. d 5 Wervtnø̀ Vpèá, rvgaq shini màvl dvgvp Nà nvng tiqdvchá vdá yv̀ngshà we Ngà ngø̀r dvgùng welù:ngí Nà mv́rdv̀ngø akvt Ngà svng shèring dakngà. e 6 Nàí rvgaq tø̀m kèní Ngà svng èzǿng bǿngà we vsvng rì kaq Nà bø̀ng Ngàí dvtan bǿngà. Angmaq nø Nàò rì èía we, Nàí Ngà svng èzǿng bǿngà nø, angmaq gø Nà kà svng cv́n døngá:mì. f 7 Ngà svng èzǿngà rì shvngbe nø, Nà yv́ng kèní í we akvt angmaqí shá bǿà. 8 Kadø íe wani Nàí Ngà svng vzíshaq kàrì nø, Ngàí angmaq svng zǿng bǿngà. Angmaqí gø vtoò nø, Ngà nø Nà yv́ng kèní bung dakngà we gø jø̀ngjǿng shá bǿà nø, Nàí Ngà dèzv́r dakngà we svng gø angmaq kv́m bǿì. g 9 Angmaq dvpvt Ngàí røtnòe; rvgaq tø̀mòri dvpvt nø mvrøtnangò. Nàí Ngà svng vzíshaq rì angmaq dvpvt mv̀ng røtnāngòe. Pàwálv́m wani angmaq nø Nàò ēíae. h 10 Vrá Ngàò èǿngang rì shvngbe nø Nàò ni èía nø, Nàò rì gø Ngàò rì ni èǿngange; Ngàí gø angmaq taqkèní dvgùng shvring we lún bǿngà. i 11 Akvt kèní Ngà nø rvgaq tø̀mø màv̄lvm. Yarì nø rvgaq tø̀mø vl ra nø, Ngà nø Nà yv́ng svng long longe. Shanshér we Vpèá, Ngàní pè nø tiq lòng íshà dø angmaq gø tiq lòng wa ílv́m rvt, Nàí Ngà svng vzíshaq, Nà jórnònggùn bø̀ng taqkèní angmaq kaq èroqò.