Kana rvwá zvmì shvzøng bóy

Kana rvwá zvmì shvzøng bóy

1 Vshø̀m ni mèpvng, Galili móng Kana rvwáø zvmì shvzøng bóy tiq lòng v̄le. Yesu angmè gø weyv́ngø vbáe. a 2 Zvmì shvzøng bóy taq nø Yesu nvng Ang coqcv́nrì svng gø vgoshaq íe. 3 Wekvt bìmtì dvbévm daqà dvgvp, Yesu angmèí nø Ang svng, “Angmaq bìmtì béaá:mà,” a:lòe. 4 Wekvt Yesuí ang svng, “Svmaré mèá, welòng rvt nà pàwá dèréshìe?* Ngà rvtø̀ shini mvhøqò,” a:lòe. b 5 Angmèí nø dvzø̄mshúrì svng, “A:ngí namaq svng kadø èv̄lvtnøng nìnø wedø èwànø̀ng,” a:lòe. 6 Yuda vsvng rì angmaq shǿlshilv́m vtóng cà:nò ke lá:ngò we, vnícé vshø̀mcé galan cv́ng we lóng chúng vchuq chv̀ng gø weyv́ngø shvrúngshaq v̄le. c 7 Yesuí angmaq svng, “Chúng werì taq tì dv̀n èzv́ngnøng,” a:lòe. Wekvt angmaqí chúngrì nø mvkā vrá dø tì dv̀n zv́ng bǿà. 8 Wekvtrá A:ngí angmaq svng, “Akvt nø èdōnøng nø, bóy vgo pè svng èlv́nga bǿnøng,” a:lòe. Wekvt angmaqí lv́nga bǿà. 9 Tì kèní bìmtì shvlè bǿà lòng svng bóy vgo pèí tīn bǿà kvt, (kayv́ng kèní í we nø tì kvp dárà we dvzø̄mshúrìí sháò we ínìgø à:ngí nø mvsháò rvtnø) à:ngí lvngàshv́rpè svng goò nø, 10 “Vsvng kagǿí gø bìmtì shvla lòng vzv̀ng shvaqò nø, aq vrv̄mvm dvgvp wa màshvla lòng tù:nòe. Nàí nø bìmtì shvla lòng akvt høq legv̀l dárà,” a:lòe. 11 Yesuí shálv́m mvshv́lpvrá wá pà:ngò we yalòng nø Galili móng Kana rvwá taq í nø, yadø Ang ngø̀r dvgùng dvta:nò yv́ng kèní Ang coqcv́nrì gø Ang svng kv́m bǿì. d 12 Wemèpvng Yesu nø angmè ó angnv̄mrì, Ang coqcv́nrì nvng tiqdø Kapernum mvrìng svng yøtshìá:mì nø, weyv́ngø tiq nila v̀lá:mì.