Ngā gvzà gøpké lú:nò we nvng coqcv́n gōò we

Ngā gvzà gøpké lú:nò we nvng coqcv́n gōò we

 Tiq kvt nø Genesaret tìnúng shvnvngø Yesu rip dvgvp, Gvray mòngkà tāshilv́m vsvng loksokrìí Ang svng shvgø̄ra:tnà. a

 Wekvt Ngā vkwìke vsvngrìí tikā tōngø vdǿn dárà we kùngshí vní gø̀m A:ngí yv̀ng bǿà. Angkàng rì nø kungshì kèní kvngshì nø shǿmgún zv̄lshìe.

 Simon kùngshí gø̀m taq Yesu zv́ngshìá:mì nø, vdàm kèní tiq ramcè dvdòrlv́m ang svng rø:tnòe. Wekvt Ang nø kùngshí taq rūng sórí, vsvng loksokrì svng shvngø:tnòe.

 Mvshǿl shǿn dv́ng bǿà dvgvp A:ngí Simon svng, “Rvnaq yv́ng svng èra:pmò nø shǿmgún rì dègøpnø̀ng,” a:lòe. b

 Simoní vtà:ngò nø, “Vkàngpèá, nøngmaqí pòyaq gø:pmì we, pàgø gøp mvlú:ni! Iwe Nà kà rvt nø dvgøpdv̀ng íe,” a:lòe.

 Angmaqí wedø dvgøp bǿà nìnø, shǿmgún rì nø dínglv́m høq ngā tiq rédø̀ng gøpké bǿà.

Wekvt angmaqí kùngshí wá gø̀m taq v̄l we rv̀mnvng rìí ladvbv̄ng rā dø wūr vwatshì sórí gōòe. Angmaq dì ráì nø kùngshí nø vtø̄n lú:ngì høq vní gø̀mgø̀m dv̀n dvzǿng lú:ngà.

 Simon Piterí welòng yv̀ng bǿà kvt, Yesu pv̄nciq yv́ngø kupshi nø, “Vkàngpèá, ngà yv́ng kèní èrv́lshìv̄m; ngà nø mvrà v̄l pè ǿngàe,” a:lòe.

Pàwálv́m wa nìnø angmaqí ngā wedv́ngte ni gøpké lún bǿà rvtnø, Piter nvng tiqdø v̄l rì shvngbe gø dádv̀ng wàá:mì.

 Simon rv̀mnvng í we Zebadi angcè Yaku ó Yohan gø dàá:mì. Yesuí nø Simon svng, “Mèsèreni; akvt kèní kukaq nø, ngā vkwí èlú:nò dø, nàí vsvng vkwí lúnlv́m í longe,” a:lòe. c

 Angmaq kùngshí gø̀mní vdàm pā svng koqa:tnà dá:ngí, angmaq dvrè v̄l dv́ngte cā la:ngò nø Ang mèpvng cv̀n bǿà.