Bìm kùlwàng kàshvbóng

Bìm kùlwàng kàshvbóng

 “Kàshvbóng vrá tiq lòng ètá dánø̀ng. Rvmá angkàng tiq gǿí bìm tiq kùlwàng ka:tnò nø wáng gùrhø̄m ha:mòe. We vdòngø bìmtì cutrà dv̀ngkø̀r gø chuq

dv̀ng, zunzvng gø tiq chø̀m wa wàò nø, kùlwàng wáshúrì svng ngáò dá:ngí ang nø dvgá móng svng dìá:mì. 

 Angshí dvkø̄m rvtø̀ tuq ráì dvgvp, angò mvtū wál bìmshí lú nvng kùlwàng wáshúrì yv́ng svng a:ngí ang vshuqrì dvzv́r bǿà.

 Iwe kùlwàng wáshúrìí nø ang vshuqrì svng ta:pmò nø, tiq pè svng nø vdipmò nø, tiq pè svng nø sha:tnò nø, vrá tiq pè svng nø lú:ngì wvp bǿà.

 Vrá tiq kvt, vzv̀ng mvdv̀mø té luq dø ang vshuq dvgá tiq mvdò a:ngí dvzv́r bǿà nìgø, werì svng gø angmaqí wedø tiqdvchá wàòe.Mèpvng nø, ‘Ngàcè pè

svng nø angmaqí vpǿ dáò ni we íe,’ wa nø angmaq yv́ng svng angcè pè dvzv́r bǿà.

 Wedø ínìgø kùlwàng wáshú werìí Angcè pè svng yv̀ng bǿà kvt, angmaq vrùng nø, ‘Zaqshøp vpvtlv́m pè nø yapè ni íe; ló, ang svng sha:tnì nø, ang

zaqshøp nø nøngmaqí tø̄lá:mì,’ wae.  Wervt angmaqí ang svng ta:pmò nø, bìm kùlwàng vdàm lap svng gūr bǿà dá:ngí shvt bǿà.Wedø í rvtnø, bìm

kùlwàng angkàng pè di daq kvt, kùlwàng wáshú werì svng a:ngí kadø wà daqòe ma?” wa, rø:tnòe.

 Wekvt angmaqí Yesu svng, “Svng mvgv́m werì svng nø angi sha:tnò nø bìm kùlwàng nø ang rvtø̀ vhø̄m rā ke bìmshí àngò wál vwálāa:tnò we kùlwàng

wáshú dvgá tiq mvdò svng ngá bǿòe,” a:lòe.Yesuí angmaq svng, “Shànshér Kàru rì taq,u ‘Chø̀m vrv̄ngshúrìí gur bǿà we lóngchv̀ng nø, chø̀m górtong

dvdø̄ng lóngchv̀ng ni íá:mì. Yalòng nø Yehowaí wà daqà we í nø, yà:ngò rì shvngbe nø, dvdv̄m vtiqlv́m íe,’ wakà svng namaqí mèrø̄ dv́rnøng ma?

 Wervtnø̀ Ngàí namaq svng v̄la:tnìni, Gvray móngdàn nø namaq yv́ng kèní vtv̀ng bǿò nø, angshí shí dvzv́r lú:ngò we tiq dvcì svng zí bǿòe. Vrá, lóng

yachv̀ng mvdv̀m taq vkupmv̄m gǿ nø, hø̄m vrø̀mv̄me; lóng yachv̀ng kagǿ mvdv̀m taq vja daq nìnø, wegǿ nø angshí jøk bǿòe,” a:lòe.  Shvrúngshú

vjìrì nvng Farisirìí, A:ngí shø̀:nò we kàshvbóng rì tá bǿà nìnø, angmaq dāng shø̀:nò we svng dǿmshì bǿì.Angmaqí Ang svng tvp mvyǿ nìgø vsvng

loksokrì svng svree; pàwálv́m wani vsvng loksokrì nø, Ang nø kà dvtutshú tiq pè í we svng kv́m rvtnø íe.