Hí wur shì vsvng dvbā:nò we

Hí wur shì vsvng dvbā:nò we
1 Yadv́ng pv̀n mèpvng Yuda vsvng rì bóy tiq lòng v̄l rvtnø Yesu nø Yerusalem svng ngāngá:mì. 2 Yerusalem Vyv̀ng bv́ngkà tiq lapmø, kùngjv̀m pungwà lòng vl nø, Hebru kàí Betzata, wa tǿò we tìdøm tiq lòng v̄le. 3 Werì kùngjv̀m taq nø zari, nede, hize rì, hí wur shì rì loksok tiq mvdò vyálshì nø, (tì bvlōngshi long we svng caòe.

Weyv́ngø, vshø̀mcé vshvt nǿng zà daqì we vsvng tiq gǿ vbáe. 6 Ang vyálshì da we svng Yesuí yv̀ng bǿà nø, gvzà vlé dø ang zà yà:ngì we shá bǿà kvt, wepè svng A:ngí, “Nà ban mèyǿ ma?” a:lòe.

7 Za pèí Ang svng vtà:ngò nø, “Vshaq pèá, tì bvlong lú:ngò dvgvp, tìdøm svng ngà kaq zv́nglv́m vsvng màvl. Ngà shøtshø̀ng dvgvp, ngà vzv̀ng dvgá vsvng lè zønshivme,” a:lòe. 8 Yesuí ang svng, “Ekungshì; nà pvlu èlv̄ngshì nø èdi,” a:lòe. a

9 Wela:ngí wepè zǿmá:mì nø, ang pvlu lv̄ngshì nø dìá:mì. Weni nø Narni íe. b 10 Wervtnø̀ dvbanshaq pè svng Yuda vsvng rìí, “Dèni nø Narni íe, nà pvlu lvngshilv́m dvrá màvl,” a:lòe. c 11 Iwe à:ngí angmaq svng, “Ngà svng dèban bǿngà pèí, ‘Nà pvlu èlv̄ngshì nø èdi,’ èv̄le,” a:lòe.

12 Angmaqí, “‘Nà svng pvlu èlv̄ngshì nø èdi,’ èvl pè nø kagǿ íe?” wa rø:tnoe. d 13 Iwe wezàngø vsvng gø luq nø, Yesu gø yilshìá:mì rvt, ang kaq dvban bǿà pè nø kagǿ í we mvshá bǿà.

14 Wemèpvng, Noqngø̀m Tø̀ngnø taq ang svng Yesuí yv̀ng bǿà kvt, “Eyà:ngò, nà nø dvbanshaq èíá:mì. Yamvdv̀m té mvgv̄m we màhǿmlv́m rvt akvt kèní mvrà mèwani,” a:lòe. e 15 Vsvng wepè dìá:mì nø, Yuda vsvng rì kaq, ang svng dvbana:pmà pè nø Yesu í we dvtáòe. 16 Yesuí Narni taq yarì wàò rvtnø, Yuda vsvng rì Ang svng vré mvnshìe.