Antiok yv́ng shvngø:tnò we

Antiok yv́ng shvngø:tnò we

  Wekvt Stepan rvtnø bung lú:ngì we vrè lòng vhǿ:mò nø vkangá:mì mvdò nø, Fenishi nvng Ciprus móng nvng Antiok wamà høq vshiná:mì nø, Yuda vsvng kaq wa mòngkà dvshā:ngòe. 

 Iwe, angmaq dvhø̀ tiqmaq nø Ciprus nvng Kureni wamà vsvngrì í we Antiok yv́ngø tuq ráì nìnø, Helenirì nvng gø vtoq vtip nø, Vkàngpè Yesu Dvbùshv̀ngkà dvsha:ngòe.

Vkàngpè wur nø angmaq nvng vl nø, mvme tiq mvdò kv́m nø Vkàngpè kaq vwv́ngshì ráì.

 Wekvt shv̀ngkà yalòng nø Yerusalem taq vl we shvngø̀mrérì vnà høq dvshvng bǿà nø, angmaqí Barnaba nø Antiok svng dvzv́r daqà. 

 Ang tuq ráì kvt Gvray jejú kaq yv̀ng bǿà dvgvp, shaqshaqwa dvbùe. Wekvt a:ngí nø, tǿng we nø:tní Vkàngpè svng angmaq tvp vnvpshìlv́m rvt, angmaq shvngbe svng dvshat dvzit mā:nòe. 

 Ang nø vsvng shvlá í nø Shànshér Pvlàcè gø, kv́mnøt gø dv̀n zø̀nge. Wekvt nø Vkàngpè kaq vsvng loksok rvma:tnà. 

 Weyv́ng kèní Barnaba nø Solo lá nvng Tarsu svng búngá:mì. 

Ang svng yv̀ng bǿà kvt, Antiok svng shøla:tnà. Wekvt tiq nǿng vhø̄m høq angní lvngà nø shvngø̀mré nvng tiqdø mvngūshì nø, vsvng mvme kaq shvngø:tnòe. Vrá, rvcv́ngcèrì svng Kristu Rvcv́ngcèrì, wa nø nv̀mlat tǿò we nø Antiok wamà taq íe.