Shagóng dvpvt gónggi mvrà we

            Shagóng dvpvt gónggi mvrà we 

Tiqka:tní wa angkàng vní gǿ svng kagǿí gø dvzø̄m mvlúnshì. Ang nø tiq pè svng shvngōshì nø tiq pè svng nø shóngshì longe. Mø̀íni tiq pè svng vpǿò nø, wápè svng nø màpǿò we v̄l longe. Welòng dø namaq nø Gvray kaq gø dvzø̄m, gv̀msùng vshé svng gø dvzø̄m, nø wá mèlúnnøng. o

  Shagóng dvpvt gónggi mvrà we Wervt Ngàí namaq svng v̄la:tnìni, namaq nø pà v́mlv́m, pà aq nø cúnshìlv́m, wa nø góng mèginøngni. Pà gwāshìlvm wa nø gø, vdè góng dvpvt mèdèréshinø̀ngni. Gø̀nshaq nø v́mlv́m mvdv̀m té vpǿ we mø̀í ma? Góng gø gwálv́m mvdv̀m té vpǿ we mø̀í ma?  Muqlàng rām carì svng èyv̀ngnø̀ng lè! Angmaq nø wø̄n gø mvwønv̄m, shvrvt gø màshvrvtnvm, vzá taq gø màrvdāv̄m. Inìgø muqlàng taqla:pmò namaq Nvpèí werì svng dvkù:mòe. Namaq nø ca werì mvdv̀m té nàpǿnøng we mø̀í ma? Góng dvgishi weí vdè vbat svng tiq rvtø̀cè rv̄mshi lú:nò we kagǿ èv̀lnøng ma?

   Pàwálv́m namaq nø gwálv́m dvpvt góng èginønge? Zømwàng vkúwvtrì kadø tē lōng we svng èyv̀ngnø̀ng. Shǿngwvt yarì nø bv̀nlì gø mvwa, yì gø mvyishì. Wedø ínìgø Ngàí v̄la:tnìni: Solomon nø ngø̀rdvgùng shvngbe v̄l dvgvp dv́ng, vkúwvt tiq wvt vnvp dv́ngte gø ang gwāshì mvlún yà:ngò. Kv́mnøt ècv̀mnøng rìé! dèni nø cúnshì, nvpni nø svmi dv̀ngkø̀r taq wv́r bǿò we zømwàng mvlì shø̄nhàcè svng dv́ng Gvrayí yadv́ngte vnvp dø dvgwāò nìnø, namaq svng nø wemvdv̀mø téwa dègwa daqnø̀ng we mø̀í ma? Wervtnø̀, ‘Pà v́mlv́m! Pà aqlv́m! Pà gwāshìlvm!’ wa, góng mèginøngni.Yadv́ng pv̀n dang rvtnø, mvnoqshi rì mv̀ng góng dvgishìe. Iwe muqlàng taqla:pmò namaq Nvpèí nø yadv́ng pv̀n shvngbe namaq zǿm èdv̀ngnøng we vsháshaq íe. 

 Namaqí nø Ang móngdàn nvng Ang døngman lòng svng vzv̀ng èlá nǿng. Wekvt yadv́ng pv̀n shvngbe namaq svng èrv̄mā daqnø̀nge.  Wedø í rvtnø nvpni dvpvt góng mègīnø̀ngni. Nvpni rà rì dvpvt nø nvpni dvréshì longe. Weni dvpvt weni dvshà we vrv̄me.