Marì nø Elizabet yv́ng di we

Marì nø Elizabet yv́ng di we

 Wemèpvng nilaí Mari búng nø, Yuda rvgaq shigùng móng tiq mvrìng svng cancan dìá:mì. Zakaria chø̀m svng ang gòngá:mì nø, Elizabet svng pàmvrà a:lò nø dvhø̄mshìe.Mari pàmvrà wa kà svng Elizabetní tá bǿà chàng, ang góng taq cv̀mré gǿ chóngshì lú:ngì nø, Elizabet gø Shànshér Pvlàcèí dv̀nzø̀ng taqsórí,shaqmèí shø̀n we nø, “Svmarérì í dv́ngte dvhø̀ taq nàí nø ìshøt ìgv̀n èlú:nòe. Nà góng taq vl we cv̀mré cèí gø ìshøt ìgv̀n lú:nòe. Ngà Vkàngpè angmè ngà yv́ng svng tùng di høq nø, kadø í nø yadø nàpǿngvtnà ma? Ku, nà pamvra èwā kà ngàí tángò chàng, ngà góng taq v̄l we cv̀mré nø dvbùnø:tní chóngshì lú:ngì. Vkàngpèí ang svng shø̀n daqà kàrì shvngbe nø vhø̄m longe, wa nø kv́m we svmaré yamèí mv̀ng ìshøt ìgv̀n lú:nòe,” wae.

Marií Gvray kaq shvrī:ngò we

 Wekvt Mari nø yadø wae: “Ngà dòngnø:tní Vkàngpè svng shvrīngòe. Ngà pvlàcè gø ngà Chv́ngkàngpè Gvray taq dvbònge.Kadø íe wani màpǿng we Ang vshuqmè svng A:ngí yv́ng ètv̀mvm bǿngà. Eyv̀ngnøng, akvt kèní kukaq mvrīl nø mvrīl vrà:mí ngà svng, ìshøt ìgv̀n lún mè, èv̄l longe. Kadø íe wani nònggùn jòrpè A:ngí nø, ngà dvpvt rīng we bv̀nlì èwv́ngāng bǿngà; Ang bø̀ng gø shànshére.  Ang svng vpǿ svre vsvngrì kaq nø, mvrīl larīl A:ngí dvsházāòe. Ang wur nònggùn kv́ng we bv̀nlì A:ngí wà bǿà. Shvrīngshì rì svng nø, A:ngí dvkāng bǿà. 

 Dùgàmzø̀rì svng nø øpkv́ng rúngtv̀ng kèní dvjáò nø, cipshì rì svng mv̀ng A:ngí shvri:ngòe. Svrí shìrì svng nø gv̄m we v́mpàí dvkāò nø, mvgàmrì svng nø A:ngí vhúng shvlō bǿà.  Nøngmaq vkop Vkàngmaq svng dv́n yà:ngà dø tiq dvchá, A:ngí nø Ang vshuq Israel svng dvbvng daqà. Abraham nvng ang dvcì cèrì svng dvciq lvpat Ang dvsházā nøt dvtan daqà,” wae.  Mari nø, Elizabet nvng vshø̀m shvlá dv́ngte vl dá:ngí ang chø̀m svng loá:mì.