Dvrá svrarì svng gùngkéò we

Dvrá svrarì svng gùngkéò we

 Wekvt Yesuí vsvng loksokrì svng gø, Ang coqcv́nrì svng gø, kà shø̀n nø,  “Dvrá svrarì nvng Farisirì nø, Moshi tvle dvrá kà pǿnashúrì íe.Wervtnø̀ angmaqí namaq svng shèngøtnøng dv́ngte nø, cv́n dvgø̄m ràe. Inìgø angmaqí wàò rì svng nø mècv̄nshìnø̀ngni. Kadø íe wani angmaqí shvngø:tnò lòng angmaqí mvcà:nò.  Angmaqí nø vlishi we døngjá dvcøp dv̀ng vsvng raqpù taq hapmāòe. Iwe angmaq vdè nø werì kaq vkoqlv́m wūrhàm tiq chàmcè gø vngvt mvkv̄mshì.

 Angmaqí wàò bv̀nlì shvngbe nø, vsa:ngí yv̀nglv́m rvt wā wàòe. Kadø íe wani angmaq bāmshi we kàru dikcèrì* svng gø dvtéò nø, bèlaq hǿngyøqrì gø yàmyàmwa shvyv̄ngshìe. Vrá, angmaq nø bóy rì nvng júrøt chø̀m rì taq té rīng we rúngrà nvng vzv̀ng lap rúngtv̀ng rì taq wa rúng mvyǿe.  Gvttø̀mø̄ vpǿ gø̄ngá ra we nvng vsa:ngí, ‘Rabbiá,’* wa nø go rā we svng shóngshie.

 Iwe, namaq svng nø vsa:ngí, ‘Rabbi,’ tǿ mèdèzv́rshinøngni; pàwálv́m wani namaqò Shvngøtshú pè nø tiq pè wa èv́lanønge. Namaq shvngbe nø angnv̄m angchvng dvchǿng èínønge.Vrá, rvgaq tø̀m taq kagǿ svng gø ‘Vpè’ mètǿnø̀ngni; pàwálv́m wani namaq Nvpè v̄llv́m nø, muqlàng taqlapmø vl pè Ang tiq gǿ wa èv́lānønge. Wemvdv̀mø, namaq svng nø ‘shø̄lshú vgo,’ wa nø gø tǿ mèdèzv́rshinøngni; pàwálv́m wani namaq svng shø̄lshú vgo v̄llv́m nø, Kristu Ang tiq pè wā èv́lānønge.

 Namaq dvhø̀ taq rīng vtv̄ng pè nø namaq kaq dvzømshú lè wáshì ràe.  Vdè svng shvringshì we kagǿ ínìgø, cip shvyǿm we vhǿm lú:ngòe; vdè cipshì we kagǿ ínìgø, wegǿ svng nø shvrīng lú:ngòe.”f