Talent tvleò we kàshvbóng

Talent tvleò we kàshvbóng

 Vrá muqlàng móngdàn nø, vsvng tiq gǿí ang vshuqrì svng goa:tnà nø, ang v́lāò dvrèrì angmaq svng tvlēò dá:ngí dvgá tiq móng svng dìá:mì weó vbónge. A:ngí angmaq tiq gǿ nø tiq gǿí wá sháò we svng cà:nò nø, tiq gǿ svng nø gv̀msùng pungwà talent; tiq gǿ svng nø vní talent, vrá tiq gǿ svng nø tiq talent zíò dá:ngí búngá:mì.  Pungwà talent vto lú:nò pèí nø wekvt chàng búng nø wulaq wàá:mà nìnø, mvzv́n pungwà talent lún bǿà.Vní talent vto lú:nò pèí gø welòng døni mvzv́n vní talent lún bǿà. Wedø ínìgø tiq talent vto lú:nò pèí nø, dv̀ngkø̀r chuq dv̀ng, angkàng pè gv̀msùng lòng lø:pmòe. Mvme vlé ráì kvtnø, vshuqrì angkàng pè vtv́ng ráì nø, angmaq nvng wulaq shìpan su:nòe.

 Pungwà talent vto lú:nò pè di ráì nø, mvzv́n pungwà talent gø lá:ngò sórí shø̀n we nø, ‘Vkàngpèá, nàí nø ngà svng pungwà talent tèle ráà we; èyà:ngò, ngàí mvzv́n pungwà talent gø lún bǿngà,’ a:lòe.Wekvt angkàng pèí ang svng, ‘Shèla nø nøttǿng kv́mv́m nàrv̄m we vshuq nàí nø, vdū døni èwà bǿà. Dvrè tiq hvncè taq gø nà nø kv́mv́m nàrv̄m we í rvtnø, ngàí nà svng mvme pv̀n mvdv̀m øpshú wáshì dvzv́rlv́m íe. Nvkàngpè dvbúrà taq mèngūshi rā,’ a:lòe. Vní talent vto lú:nò pè gø di ráì nø, ‘Vkàngpèá, Nàí ngà svng vní talent tèlē ráà we èyà:ngò, ngàí mvzv́n vní talent gø pō lún bǿngà,’ a:lòe. Angkàng pèí ang svng, ‘Shèla nø nøttǿng kv́mv́m nàrv̄m we vshuq nàí gø, vdū døni èwà bǿà. Dvrè tiq hvncè taq gø nà nø kv́mv́m nàrv̄m we í rvtnø, Ngàí nà svng mvme pv̀n øpshú wáshì dvzv́rlv́m íe. Nvkàngpè dvbúrà taq mèngūshi ra,’ a:lòe. 

 Wekvt tiq talent wa vto lú:nò pè gø dì ráì nø, ‘Vkàngpèá, Nà nø, màwø̄nshaq yv́ng kèní shèrvtnv̄m nø, màshvrvtshaq yv́ng kèní gø dèkø̀mv̄m we, nøtzaq pè èí we ngàí shánge. Wervt nà svng svrēng weí, nà gv̀msùng tiq talent lòng nø màmvng dø vbā taq løp yv̀ngà, yalà! nàò lòng v́ldv̀ng wae,’ a:lòe. Wervt angkàng pèí ang svng, ‘Vzīng we vshuq mvgv́m nàá, ngà nø màwønshaq yv́ng kèní shvrvtnv̄m nø, màshvrvtshaq yv́ng kèní gø dvkø̄mvm we svng nàí èshángànø̀ng nø,ngà gv̀msùng yalòng nø gv̀msùng dø̄m taq èzá:ngò lè! Wedø èwàò nìnø ngà vtv́ng dak kvt ngà gv̀msùng nø vmit nvngnvng vtv̄ngshì lúnò nøng we íe. Wervtnø̀, talent lòng nø ang yv́ng kèní èlùvtnøng nø, tiqcé talent lú:nò gǿ svng lè èzínøng.

Kadø íe wani v́lāò gǿ svng nø rv̄ma daqò nø ang nø gvzà luqa lú:ngòe. Màv́lāò gǿ yv́ng kèní nø, angò v́laò hv̄ncè gø lùv́m bǿòe.  Wedø í rvtnø zǿm mvdv̀ng we vshuq yapè svng nø vtv́nglap cǿngcǿng dø vdòng svng ègūr bǿnøng; weyv́ngø rvyù sórí shà vjitshi nø laq vl,’” a:lòe