Hi wur shi vsvng dvba:no we

adv́ngpv̀n mèpvng, Gvrayí Abraham svng vløtlv́m wā nø, “Abrahamá,” wā gōòe. A:ngí, “Ngà yayv́ng v̄le,” a:lòe. a  Wekvt Gvrayí, “Akvt nà èshóngshì we nvcè pè, nvcè lòngzà pè Isak èshø:lò sórí, Moria rvgaq svng èngāngv̄m. Ngàí nà svng dvtān dak we mvrùl tiq mvrùl taq, ang svng wv́r núngpà èwàò nø shèrúng lú:ngò,” a:lòe. Wervtnø̀ sháng mvgágá Abraham kungshì nø, lozèdvcheq ríkop dvcø:pmò nø, angò gùchàngré vní pè nvng angcè pè Isak kaq shø:lò nø; wv́r núngpà dvpvt kām vcø:tnò dá:ngí, Gvrayí ang svng dvtúò rvgaq svng búngá:mì.  Vshø̀m ni wani taq Abrahamí dvjaqò nìnø, vrúm yv́ng kèní wervgaq svng yv̀ng bǿà. Wekvt Abrahamí ang gùchàngré pèní svng, “Nàní nø yayv́ngø lòzèdvcheq nvng èvl dáshì. Ngàó lvngàsvré pè ngàní pè nø taqyv́ng ngāngv́mshì nø, ngàní pèí noqngø̀mshò dá:ngí vtv́ng daqshìe,” a:lòe. Wekvt Abrahamí wv́r núngpà dvpvt kām nø angcè Isak svng baq dvzá:rò nø, ang wur taq nø svmi nvng shv̀m tiqkā lá:ngò sórí, angnípè tiqdø ngāngá:mì.  Wekvt Isak nø angpè Abraham svng kà tv́ngshì nø, “Vpèá,” a:lò kvt, angpè Abrahamí, “A, ngàcèá,” wa vtá:nòe. Isakngí, “Eyà:ngò, svmi gø, kām gø v̄le; íni wv́r núngpà vyv̀ngcè nø kayv́ng v̄le?” wa rø:tnòe. Abrahamí, “Ngàcèá, wv́r núngpà vyv̀ngcè nø, Gvray Ang vdè dvpvt Ang dvgǿshì dae,” a:lò nø angní pè tiqdø dí mvnshìá:mì.  Gvrayí dvtúò rvgaq svng angní pè tuqá:mì nìnø Abrahamí weyv́ngø shvrúngrà tiq lòng vrā:ngò nø, wemvdv̀mø kāmrì gø rvzā:ngò dá:ngí, angcè pè Isak svng gø mvhū:mò nø, shvrúngrà taq kāmrì mvdv̀mø ang svng ha:pmòe. Wekvt Abraham ang wur zúshi nø, angcè pè svng shvtlv́m shv̀m lùòe.  Iwe Yehowa Ang dvzárí muqlàng kèní ang svng gō daqà nø, “Abrahamá, Abrahamá!” wae. Wekvt Abrahamí, “Ngà yayv́ng v̄le lé!” a:lòe.  Wekvt A:ngí rá, “Lvngàsvré pè svng dvlálv́m wūr mèzúshìni; ang svng kv̀m gø mènàkoqni. Pàwálv́m wani, nàí nø nvcè pè, nvcè lòngzà pè gø Ngà svng zí èka:mò høq Gvray kaq vpǿ svrēnøt èv̄l we svng akvt Ngàí sháng bǿngà,” a:lòe. Abraham kāng ngángshì dvjaqò nìnø, kū, ang mèpv̄nglap shǿngpóng taq, rø̀ng vhuq we vyv̀nglá tiq gō v̀l dárì. Wekvt Abraham dī nø vyv̀nglá go lùa:tnà nø, angcè pè tvlē wv́r núngpà wàò nø shvrú:ngòe.  Wervt Abrahamí wezàng svng bø̀ng tǿò nø, Yehowa Yire* a:lòe. Wervtnø̀ dèni høq kà dvcv́n shø̀:nò nø, “Yehowa mvrùl taq mv̀ng tvlú dvgø̀ dáòe,” wae. Kàgvp shvdø:ngò we  Yehowa Ang dvzárí muqlàng kèní Abraham svng vní kvt wakvt go daqà nø,  “Yehowa yadø shø̀n daqì: Ngà nø Ngà yadø dvgv́mshø̀ng bǿngà. Nàí yadø èwàò nø, nvcè pè, nvcè lòngzà pè gø Ngà svng zí mèrakngà we màvl rvtnø;  jø̀ngjǿng Ngàí nà svng ìshøt shvluqālv́m íe.* Nà pvlí pvlaqrì gø muqlàng kùrnip luq dø shvlokngò nø, nvmukdvra tìrìn zishìl luq dø shvluqālv́m íe. Vrá angmaqí nø angmaq kaq ngv̀nshà rìò wamà gòngchitrì angkàng wáshì lún lú:ngòe. Vrá nàí nø Ngà kà svng yadø ètángāng bǿngà rvtnø, rvgaq tø̀mø vsvng dvcìrì í dv́ngteí nø, nà pvlí pvlaqrì taqkèní ìshøt ìgv̀n lún lú:ngòe,” a:lòe. Wedá:ngí Abraham nø angò gùchàngré pèní yv́ng svng vtv́ng daqì nø, angmaq búng taqsórí Beersheba rvgaq svng tiqdø tuq daqì. Wekvt Abraham nø Beersheba rvgaqø v́ldv̀ng wae.