Mati gōò we

Friday, July 05, 2019

Gvray mongka Tiq tut Nvmlat Nvmpvng 23:1-4,19,24:1-8,62-67

Sara nø ang bat tiqyá vnícé shvngøt nǿng cúnshì yà:ngì. Ang lvpat angnǿngrì nø yadv́ngte wā í yà:ngì. Sara nø Kanan móng Kiriatarba rvgaq, Hebron mvrìng taq shì yà:ngì. Wervt Abraham nø Sara dvpvt rv̀ngshvng wa nø ngøt yà:ngà. Wedá:ngí Abraham nø ang chø̀mmè vnàng zīn yv́ng kèní búng nø, Het pvlí pvlaqrì svng yadø a:lòe. “Ngà nø namaq dvhø̀ taq v̄l we wv́ngzà nvng mvnv́m zaqlè ǿngàe. Ngà chø̀mmè shì vnàng kǿmlv́m dvgv̀m wàlv́m namaqò rvgaq tiqzàng èzíshà,” a:lòe. Yarì mèpvng Abrahamí nø ang chø̀mmè Sara shì vnàng svng, Kanan móng taq Hebron lá:nò we Mamre nv̀mshv̀ng yv́ng, Makpela rvmá hv́ng yv́ng vl we lóngdùng taq kǿm yà:ngà.

Abraham nø gǿngzø̀l gǿngyàng v̄l sórí mvme svrǿng ráì. Pv̀n vrv̀m taq gø Yehowaí ang svng ìshøt ìgv̀n shvmánāòe. Abrahamí nø, ang v́lāò dv́ngte mvdv̀mø øpshú, ang dvzømshú té vshaq pè svng gōò nø, yadø a:lòe. “Nà wur nø ngà pv̄ntùng lv̀ngpvng rèzǿshìra. Ngàcè pè dvpvt zvmì nø, akvt ngà nvng à:lì we Kanan zvmìcèrì taqkèní mvláālv́m, muqlàng nvng rvgaq Angkàng Gvray Yehowa bø̀ng taq dègv́mshì. Ngà v̀l yv̀ngà rvgaq, ngàrì ngàrvprì yv́ng svng èdivm nø, ngàcè pè Isak dvpvt zvmì tiq mè lúā ràe,” a:lòe. Ang dvzømshú pèí ang svng, “Svmaré wemè ladv́ng yamóng svng lō mvtá rā nìnø, nà èbúng yà:ngì móng svng vrá ngàí nvcèpè lè vtv̀ng bǿngònøng ma?” a:lòe. Wekvt Abrahamí rá ang svng, “Ngàcè pè nø wemóng svng bvttut vtv́ng mvdaq! Ngà vpè chø̀m nvng ngà ègv̀l yv̀ngà rvgaq kèní ngà svng èrv́l nø, kà shø̀n daqì nø dvgv́mshi sórí, ‘Yamóng nø nà pvlí pvlaqrì svng Ngàí zílv́m íe,’ èv̄l yv̀ngà pè, muqlàng rvgaq Angkangpè Gvray Yehowa A:ngí nø, nà vzv̀ngzv̀ng Ang Dvzv́r dvzv́r dáòe. Wekvt nàí wemóng kèní ngàcè pè dvpvt zvmì tiq mè lúā ràe. Iwe, svmaré wemè nà mèpvng zv́n lā mvtá long nìnø, ngà svng dègv́mshì we kà yalòng taqkèní nà èlutshìv̄me. Inìgø ngàcè pè nø wemóng svng dvtv́ng mvdaq,” a:lòe.

Wenila taq Isak nø Beer-lahay-roy rvgaq svng dìá:mì yv́ng kèní vtv́ng ráì nø; Negep rvgaqø v̄le. Dørø̀m là:mí Isak nø nøt vshv́rshìlv́m vdv́m tø̀m svng dìá:mì. Wekvt ang kāng ngángshì dvjaqò nìnø, golawu vyv̀n ráì. Wekvt Rebekaí gø kāng ngángshi dvjaqò kvt, Isak kaq yv̀ng bǿà weó, golawu kèní lāshie. Pàwálv́m wani dvzømshú pè svng a:ngí, “Vdv́m yv́ngø nøngmaq nàtōvtshàpè nø kagǿ íe ma?” wa rø:tnò ke, dvzømshú pèí, “Ngà vkàngpè íe,” wa nø v̄l dárà. Wekvt Rebeka nø ang mv́r dvkøq laqtūn lūshì nø, ang mv́r dvkøqshìe. Wekvt dvzømshú pèí nø, a:ngí wàa:pmàrì shvngbe Isak svng, dvtáòe. Wemèpvng Isakngí angmè Sara shìyat svng Rebeka dvgù:ngòe. Wekvt Rebeka svng ang lūshì nø, ang nø ang chø̀mmè í yà:ngì. Isakngí gø Rebeka svng gvzà shù:ngòe. Isak angmè shìá:mì mèpvng nø wekvt wa a:ngí nøt shvlø̀m we lún yà:ngà.

Mati 9:9-13

Weyv́ng kèní Yesu dìá:mì kvt, Mati tǿò we tiq pè kùyà tǿ rà yv́ng rūng dā we svng yv̀ng bǿà nø ang svng, “Ngà svng ècv̀n rā,” a:lòe. Wekvt ang tv̀m búng nø, Yesu mèpvng cv̀n bǿà. Wemèpvng, Ang nø Mati chø̀m taq v́mpà v́mlv́m námrung dvgvp, kùyà gú:nò rì nvng mvrà vl vsvng* mvme gø, Yesu ó Ang coqcv́nrì nvng tiqdø v́mpà v́mlv́m námrunge. Welòng svng Farisirìí yv̀ng bǿà kvt angmaqí Yesu coqcv́nrì svng, “Namaq Svra pè nø kùyà gú:nò rì, mvrà v̄l vsvngrì* nvng tiqdø kadø̄ í nø v̄m aqe ma?” a:lòe. Yesuí tá bǿà kvt a:lò we nø, “Cìsvra nø zarì dvpvt wa zǿmdv̀nge, mvza vsvng nø zǿm mvdv̀ng. Kàru taq, ‘Ngà nø shvrúng núngpà mvdv̀mø mvréza nøt svng mv̀ng té shònge,’ wa kà ang lvjø̄m ècvnshiv́mnøng. Pàwálv́m wani Ngà nø, døngman vsvng kaq go nvng dø̀ng dakngà we mø̀í, mvrà v̄lrì svng lè go nvng dø̀ng dakngà,” a:lòe.