Yesu vjú røtkà

Wednesday, July 17, 2019

Gvray Mongka Tiq Tut Bungam 3:1-6,9-12

Wenila taq Moshií nø, angkø̀ pè Midian shvrúngshú pè Yetro vyv̀ngrì roqāòe. A:ngí vyv̀ngré nø zømwàng svng shø̄l bǿà nìnø, Gvray shìgùng, Horep yv́ng tuqá:mì. Wekvt Yehowa Ang dvzv́r nø shǿngpóng vdòng taq vcōr we svmi mv́làm dvhø̀ kèní dvtánshìe. Moshií dvjaqò nìnø: ku, shǿngpóng taq svmi mv́làm vcōr we, shǿngpóng nørá màkat we svng yv̀ng bǿà. Wervt Moshi nø, “Kadø í rvt shǿngpóng nø màkat ráì! Yalòng nø dàlv́m tiq lòng íe. Ngà tvp dø̄ng nø yv̀ngv́mòe,” wae. Moshi tvp di ráì we svng Yehowaí yv̀ng bǿà kvt, “Moshié, Moshié,” wa nø shǿngpóng vdòng kèní Gvrayí gōòe. Moshií “Ngà yayv́ng v̄le,” wa vtá:nòe. Vrá, “Nà yayv́ng svng mènànvpshì rani; nà híshvnam èchutshi; pàwálv́m wani, nà èrip zàng nø shànshér we rvgaq íe,” a:lòe. Wekvt rá a:ngí, “Ngà nø nvpèò Gvray, Abraham Gvray, Isak Gvray nvng Yaku Gvray ǿngàe,” a:lòe. Wekvt Moshi nø Gvray kaq yv́ng màzaqò rvtnø, ang mv́r dvkøqshìe.

Eyà:ngò akvt, Israel dvcì cèrì vkiq we shaq nø Ngà yv́ng tuq lú:ngì; wemvdv̀mø mvtaq, Ejip vsvng rìí angmaq svng shvnip shvna:lò rì svng gø Ngàí yv̀ng bǿngà. Wervtnø̀, ló, Ngà bashà Israel cèrì svng nàí Ejip móng kèní vgùnglv́m dvpvt, Farao koqkv́m yv́ng svng Ngàí dvzv́rvtnøng,” a:lòe. Iwe Moshií Gvray kaq, “Ngà nø kagǿ ǿngà rvt Farao koqkv́m yv́ng svng dø̄ng nø, Israel cèrì kaq Ejip móng kèní vgúng lvlúnò nǿng?” wa vtá:nòe. Vrá Gvrayí, “Ngà nø jø̀ngjǿng nà nvng v̀llv́m íe; vrá nà svng dvzv́r bǿngà pè nø Ngà ni ǿngà we mvshv́lpvrá nø yalòng í longe. Bashà rì svng Ejip móng kèní nàí nàgùnga:tnò dá:ngí, namaqí nø shigùng yalòng taq Gvray kaq dèzø̄m* lóngnønge,” a:lòe.

Mati 11:25-27

Wekvt Yesuí, “Muqlàng rvgaq Angkàng pè Vpèá, Nà svng oqà wv̄nge. Kadø íe wani, yadv́ng pv̀n nø zitnøt rálnøt vl rì nvng gvcvt paqzí vl rì taqkèní Nàí èmáò nø, cv̀mré rì* svng lè dètan daqà. tuÍe, Vpèá, Nà èwv́mshì we nø yadøni ílv́m lòng ni íe. Vl dv́ngte shvngbe nø Vpèí Ngà svng tvleshaq íe. Vpèí wa mø̀í nìnø, Angcè pè svng sháò vsvng tiq gǿ gø màvl. Vrá, Angcè pè nvng A:ngí dvtánā mvyǿ gǿ wegǿí wa mø̀í nìnø, Vpè svng sháò vsvng tiq gǿ gø màvl,” wae.