Noqngø̀m Tø̀ngnø dvshè:rò we

Noqngø̀m Tø̀ngnø dvshè:rò we
13 Wekvt Yuda vsvng rìò shvlē bóy tuq yùl ráì nø, Yesu nø Yerusalem svng ngāngá:mì. 14 Noqngø̀m Tø̀ngnø wáng vdòng taq, nungwà, vyv̀ng nvng kāø nvmke vsvng gø, gv̀msùng chèòrì rūng da we svng gø A:ngí yv̀ng bǿà. f

15 A:ngí bv̀nri mvship tiq lòng wàò dá:ngí, angmaq shvngbe svng gø, vyv̀ngrì nvng nungwàrì svng gø, Noqngø̀m Tø̀ngnø wáng kèní A:ngí lù:ngò nø, gv̀msùng chèòrì gv̀msùngrì gø upmāò nø, angmaq hapjv̀mrì gø ngaqa bǿà.

16 Kāø nvmke rì svng gø A:ngí, “Yarì yayv́ng kèní èlv́ngke bǿnøng. Ngà Vpè chø̀m nø namaqò wùlaq chø̀m wàlv́m mø̀í,” a:lòe. g 17 Wekvt Ang coqcv́nrìí, “Nà chø̀m dvpvt nøtlø̀m lù:ngí Ngà svng èlúmkeng longe,” wa vrū yà:ngà kà svng dvdv̄m rǿna:tnà. h

18 Wedø í rvtnø Yuda vsvng rìí Ang svng, “Yadv́ng pv̀n nàí wàlv́m vmíng èvl we nøngmaqí shálv́m, mvshv́lpvrá Nàí kapà dètānshàni ma?” a:lòe. i 19 Yesuí angmaq svng, “Shànshér Tø̀ngnø yachø̀m ècatnøng; vshø̀m ni taq rá Ngàí shvrip lóngòe,” a:lòe. j

20 Wervtnø̀ Yuda vsvng rìí, “Shànshér Tø̀ngnø yachø̀m nø vbìcé chuq nǿng wàò ke wa dv́ng yà:ngà. Vshø̀m ni cèí Nàí kadø wá ledá:ngò ni?” a:lòe. 21 Iwe A:ngí shø̀:nò we Shànshér Tø̀ngnø nø Ang vdè góng svng tvnushi we íe. k 22 Shì yv́ng kèní Ang svng dvzun lú:ngà mèpvng wa, A:ngí shø̀:nò we yakà svng Ang coqcv́nrìí dvdv̄m rǿ:nò nø, Shànshér Kàru svng gø, Yesuí shø̀n ráà kà svng gø angmaq kv́me.