Dèni Dawi mvrìng taq namaq dvpvt Chv́ngshú tiq pè gv̀l bǿà. Ang nø Kàngpè Kristu íe.

Kristu nø Gvray í we

 Mòngkà nø nv̀mlat nv̀mpv́ngø àv́lshaq íe. Vrá, Mòngkà nø Gvray nvng tiqdø àv́lshaq í nø, Mòngkà nø Gvray ni íe.  Mòngkà nø nv̀mlat nv̀mpv́ngø Gvray nvng tiqdø àv́lshaq íe.  Vl dv́ngte shvngbe nø A:ngí pá:nò nø, pá:nò dv́ngte taq Ang màbá dø tiq pv̀n gø mvpv́n yà:ngò.  Ang vdòng taq nø Gø̀nshaq v̄le; vrá Gø̀nshaq yalòng nø vsvng dvpvt Gálòng íe. Gálòng nø dø vdòngø svr daqì kvt, dø̄lu:ngí gálòng svng mvdv́ngkéò.*  Gvrayí dvzv́r daqà we vsvng tiq pè dì daqì; ang bø̀ng nø Yohan íe.  Yapè di daqì lòng nø, vsvng shvngbe nø Ang taqkèní lvkv́m ra dø Gálòng dvpvt shvkse wáshìlv́m dvpvt íe. Ang vdè nø Gálòng mø̀í; Iwe Gálòng dvpvt shvkse wáshìlv́m dì daqì.  Vsvng í dv́ngte svng vwanalv́m Gálòng mvdø̀ng nø rvgaq tø̀m svng dì daqì. Rvgaq nø ang kà taq kèní pv́n yà:ngà we ínìgø rvgaq tø̀m svng Ang dì daqì kvt rvgaqí Ang svng mvsháò. Ang nø Ang vdè vsvng rì yv́ng di daqì nìgø, Angò vsvng rìí Ang svng màtoò. Iwe Ang bø̀ng kaq kv́m nø, Ang svng vtoò dv́ngte svng nø Gvray angcè ílv́m vmíng vkv́ng A:ngí zíòe. Gvray angcè ílv́m nø shing shvwi v̄l vsa:ngí gà:lò yv́ng kèní mø̀í. Vsvng nøt kèní gø mø̀í, Gvrayí shvza:tnò we taqkèní wa íe.

Mòngkà nø shagóng í daqì we

 Mòngkà nø shagóng í daqì nø, nøngmaq nvng tiqdø v̀l daqì. Ang pòngbàng ngø̀r we svng gø nøngmaqí yv̀ng yv̀ngshà. Welòng nø jejú nvng dìnglòng dv̀nzø̀ng we, Vpè Gvray Angcè lòngzà pèò ngø̀r dvgùng íe.  Yohan nø Ang dangø shvkse wáshì nø yadø vkiqe. “Ngà mèpvng di daq pè Ang nø, ngà mvdv̀m té ring pè íe, wvng nø vzv̀ng kèní shø̀nò pè nø yapè íe. Kadø íe wani ngà shini màvl dvgvp kèní Ang nø àv́lshaq íe,” wae. mKadø íe wani Ang dv̀n shóng we jejú taqkèní nøngmaq shvngbeí nø, jejú mvdv̀m jejú lún bǿshà.  Kadø íe wani Dvrá lòng nø Moshi taqkèní èzí yv̀ngshà. Jejú nvng dìnglòng nø Yesu Kristu taqkèní tuq daqì we íe.  Gvray kaq yv̀ng dá:rò vsvng nø kagǿ gø màvl. Vpè pøtpúmø vl we Gvray Lòngzà pèí mv̀ng Gvray nø kadø í pè í we chaqdvp dètan daqshà