Yeruí Yesu gōa:tnà we

Yeruí Yesu gōa:tnà we
 Yesu nø yapa svng kùngshí taq vrá léshì ráì nø tìnúng shvnvng shini v́ldv̀ng wa ke, vsvng loksok nø Ang yv́ng svng kø̀m
ráì. Wekvt Yeru wa tǿò we júrøt chø̀m øpshú tiq pè dì ráì nø, Ang hí shvnvng kǿngkupshì sórí, 

  Ang svng mvdø̀ng mvdaq rø̀:nò nø, “Ngàcè mè nø shaq dvtlv́m dv́nshìe, ang zǿm long nø cúnshi lúnlv́m dvpvt, Nà èdi
ra nø ang mvdv̀m wur èhapshi ra, wvng røtshø̀nge,” a:lòe.  Wervt Yesu nø ang mèpvng dìá:mì. Vsvng loksokrìí gø Yesu
mèpvng cà:nò nø Ang svng shvgø̄ra:tnà.

 Tiqcé vní nǿng døp shvwi vyø nø za we svmaré tiq mè gø vbáe. Ang nø v́laò dv́ngte shvngbe be høq cìsvra mvme gǿí
cì wáaò nìgømvban dvshàshà zae. Yesu mòng a:ngí tá bǿà nø, vsvng loksok dvhø̀hø̀ shvløtshì ráì weí, mèpvng lap
kèní Yesu bèlaq svng shu:pmòe. Kadø íe wani ang nø, “Ngàí Ang bèlaq svng wa shup lúnò nø̀ng gø ban longe,” wa
dvdā:mòe. Wela:ngí ni ang shvwi vyø lòng nø vtv̄ngá:mì nø, ang góng taq za lòng gø zǿmá:mì we dǿmshi bǿì.

  Yesu nø Ang góng kèní jórnònggùn búngá:mì we svng chàng dǿmshi bǿì nø, vsvng loksok dvhø̀ø wv́l poshì sórí,
“Ngà bèlaq svng kagǿíèshupme?” wae. Wekvt coqcv́nrìí Ang svng, “Vsvng loksu:kngí nà svng shègør we Nàí gø
èyà:ngò ke kagǿí èshup we nø kadø walvsháìni?” a:lòe.

  Inìgø, Yesuí nø Ang svng shup bǿà gǿ svng yv̀nglv́m dvpvt, gùrgùr svng dvjaqòe. Svmaré wemè nø, ang góng taq
baná:mì we svng sháshì bǿì rvt svre vdv̀n sórí dì ráì nø Ang mv́rdv̀ngø kǿng kupshi sórí kadø íá:mì we shvngbe dvtáòe.
 Yesuí ang svng, “Ngàcè mèá, nà kv́mnø:tnínà svng dèban bǿì. Pàmvrà èlo; nà zøtna lòng laq zǿmvm,” a:lòe.

 Ang wedø shø̀n la:ngí jurøt chø̀m øpshúpè chø̀m kèní vsvng dì ráì nø, “Nvcèmè shìá:mì; svra pè svng dvshá mèwāani”
a:lòe. Angmaq shø̀nkà svng Yesuí tá bǿà chàng júrøt chø̀m øpshú pè svng, “Mèsèreni, kv́mdv̀ng èwa,” a:lòe. A:ngí Piter,
Yaku nvng Yaku angnv̄m pè Yohan svngwa shø̄:lò nø,

 Jurøt chø̀m øpshú pè chø̀m svng angmaq tuq ráì nìnø, vsvng vhaqshì we nvng ngø nø, rv̀ngshvng wa we svng A:ngí
yv̀ng bǿà. Vdòng svnggòngá:mì ke, A:ngí werì svng, “Pàwá nàhaqshìnøng nø èngǿnø̀nge ma? Cv̀mré mè nø shi we
mø̀í, yøp we lè íe,” a:lòe.  Wervt angmaqí Ang svng vhø̄ò nø zērkéòe. Inìgø, A:ngí angmaq shvngbe svng dvka:ngò
dá:ngí, cv̀mré mè angpè angmèó, Ang nvng tiqdø dì ráì rì svng shø:lò nø cv̀mré mè vyà:lò yv́ng gòngá:mì.

 A:ngí cv̀mré mè wur zø̀:mò sórí, “Talita kum,” a:lòe. (Yakà nø, “Cv̀mré mèá, ngàí v̄lvtnøng, èkungshì,” wakà íe).  
Cv̀mré mè nø wela:ngí ni søt kungshì nø die. Angmaq vtv̄ng kèní dádv̀ng wàá:mì. Ang nø tiqcé vní nǿng ram í
dá:rì. Yesuí yalòng dang kagǿ svng gø màdvtálv́m angmaq svng dvká:mòe. Vrá, cv̀mré wemè svng v́mpà zílv́m
dvká:mòe.