Yesu Hkristu svng Noqngøm tøngnu kaq vp dvle we

Yesu Hkristu svng Noqngøm tøngnu kaq vp dvle we(Luke 2:22-40)

Gvray Mongkà svng tá nø nònggùn èlùshìnøng we vnvmchvngri shvngbe svng Pàmvrà. Dèni nø Longza pè Yesu Hkristu svng Noqngøm tøngnu kaq vp dvle we bóy àngni íe. Rø v-du we Gvray móngkà nø Luka 2:22-40 ciq vdòng taqkèní íe.

Vpø'íwe pèmè vnvmchvngmaqe dèni nø longza pè Yesu Hkristu kaq svng angpè angmè ní íwe yosep nvng Mari taqkèní Noqngøm tøngnu kaq vp dvle we bóy àngni íe. Wèwa mv-taq dèni nø holy chilhood cvmrécèò bóy àngni gø íe. Cvmrérìò vlún vkvng rì svng zí we, Cvmrérì kaq svng roqgar we bóy àngni gø íe.

Vkangpè Yesu Hkristu svngzace shvle shì nø rvgaq tøm taqø gvl daqa we rvtø lvngcha taq Yuda dvci rì nø Àngmaqò nī vrvm lvpat cúnshì we tvrà taq reng vpø dø dvshàn dvshershi nø àngmaqò dari mvsat kùmlà Tong dvrárì svng gø dvdvm taqsórì cvndvgøm nø cúnshì yangì we íe.

Tong dvrá mvmè svng cvndvgømò weí Gvray nvng gø nítvp dø tasvng tale vzø'm vzàp we, Wèwa mv-taq shóngnønt dvkvm Kà rì svng gø chaqdvp cvndvgøm nø dvtán we dangrì gø íe. Vrá nø Gvrayò shóngnønt dvrá rì svng vrá vta'n we taq nvmlat nvmpvng íwe àngò Kà svng KVM nø vtoshì we taq Vgo v-ngømshì nø vtōshì we wā mø-í dø vjvng laqyarì taqkèní gø vrangshì we lvpat svng chaqdvp dvtán nø shvkse wáshì taqsórì cúnshì we dang gø íe.

Vpø íwe vnvmchvngmaq, Vkangpè Yesu nø dvkv'm kà Dvrá nvng Tong dvrá rìò Àngké pè gø íe. Wervt shvrúngshú pè Simeon àngíni Àng nø móng tøngtangò Gá lòng íe wànø shvring yangà we svng ( Luka 2:22-40) vdòng taq shálún shìe. Wèlong Gá lòng íe nø cøngdø vdòng taq v-li we vsvngpvn dvcirì Shvngbe svng chvngshúpè íe. Chutchv'ng weò ìshøt igvn nø Gvray gvsang vdòng taqø nøngmaq vsvngpvn dvcirì shvngbe nø tiqnønt tiqmvyung wáshì nø vl lvm, cúnshì lvm dvpvt íe.

Vkvtdø íwe mongzøl we lvpat svng nøngmaqí vtoshì lúnlvm rvt nøngmaq nø Gvray àngcè pè Vkangpè Yesu àngì shøn yangà we Mongkà, dvkv'm Kà Dvrá rì, dvnung yangà we bvnlìrì, àngíni dvzvr (12) vní pè shølshú vgo Piter mvdvm vrvng yangà we shvngømré vdòng taqø Yesu lvmboqrì dø kvmnønt, shóngnønt, cìpshì nønt , vzaqshì nønt, vlømshì nøntni cvndvgøm nø, dvnung taqsórì shvbóng shvmvtshì nø, cúnshì lúnlvm , Kvmnønt nònggùn lùshìlúnlvm nø gvzà vchvk we íe.

Vrá nø,dèni nø longza pè Yesu Hkristu kaq svng Noqngøm tøngnu taq vp dvle we bóy àngni ídø tiqdvchá shvngømré vdòng holy chilhood nøngmaqò cvmrécè rì kaq svng vpø shvring nø vjúrøtna we àngni gø íe, wà Kà svng gø dvshat nø nònggùn zí mvyøngè. Shvngbe Gvray mongzøl lòng vtoshì leqlúnøng. Shvngbe svng oqā.