' Kvmnønt tvrà kaq mvdøng mvdaq dvdut lòngí Sasvname vhánglvm ma-vl ' Svrabyin koqkvm pè Francis shøn we

' Kvmnønt tvrà kaq mvdøng mvdaq dvdut lòngí Sasvname vhánglvm ma-vl ' Svrabyin koqkvm pè Francis shøn we shvngkà

Svrabyín koqkvmpè Francis ínø ' Kvmnønt tvrà svng mvdøng mvdaq dvdut lòngí sasvname vháng vlúnlvm møi wa' shøn bǿà we íè. Svsabyín Francis ínø Kà yalòng svng Svrabyín pè ( ma-vl) Benedet(16)ò  Mòngkà svng vrá shønò we dang íè.

Svrabyín pè Francis nø (2023) nøng tiqnøngò nár vshømni vrvm vjúrø̀tshì we shvngømrérì nvng St. Piter noqngømtøm taq vhøm dvgvp shvngøt dvtú dang svng cvnà bǿà we íè. Vle a:mì we nøng ' discernment' ( V-yáshì ra we ) dang rì svng dvdit dvle nø cvnà bǿà. Dènøng vdòng taq vrá ' evangelization ' ( Dvbushàng mongkà dvsherlvm rvt dvshvng we )  dangrì dvdit tvle lvm íwe dang svng gø shøn bǿà we íè.

Dvbushang mongka vsher lvm dvshang we nø àngké sasvnameò gønshaq padø gvza vchvk we bvnlì íè. Wè bvnlì wàwè ma-vl ninø sasvna me nø udø udø shú:nglvm wā íè. Dvbushang mongka svng dvshang we ma-vl ninø kømzøp we ang dvja svng tuqlúnlvm rvt vlǿmshì lòng gø gvzà dvdvm vléshì dang iè wā bǿ:nàòe. Sasvna me kaq vháng vlún dø tubùm lún rì taqkèní wurlaq ku dvdut rì mvdvm shóngnønt íwe dang svng svrabyín koqkvm pè Francisí shøn bǿà.

Svrabyín koqkvm pè Benedet (16) kèní nøngmaq kaq svng ècvnà bǿshà dø sasvna me ínø kvmnønt tvrà kaq mvdøng mvdaq dvgòng we mà-vl. Íni gø nønt lalúm ra dø shvzøngshì taqsórì cúnshì ràe. Yà mvtú svng bvttut vná mvdaq. Ya dang svng Svrabyín pè Benedet (16) í (2007) Ladín America nvng Crebyia Catholic svrado angké mvdoò (5) baq lìpong me ò nvmlat wái taq gø shøn yangà.

Gvray vdong màvl bǿì we Svrabyín pè Benedet (16) ò dvkvm kà svng mvtū nø Svrabyín pè Francis àng taqkèní gø rvzvngce lvpat svng dvdvm vjvnglvm rvt mvtú tiqlòng ku rvzvng bǿà we íe.

Rvzvngcerì kvmnønt tvrà kaq mvdøng mvdaq dvdòl we svng yvng lúni nø shìpvn taq shøp ràe. Yadø íwe vdòng rvzvngce wáshì vdu rì nø rvzvngcerì mø_í. Àngmaq nø rvzvngce ku sheléshì nø Gvray kaq mvkv́m rì íe. Pàwálvm wàni nø àngmaqò nønt mvsøní nø gvray kaq mvkám. Mà toò rvt íe wa shønòe. Svrabyín pè nø vle a:mì we ni Monggvn tøngtang kèní vjúrøt shìlúngì we shvngømré rì nvng vhøm we lvngdøm taq Vjúrøtshì mvdò kaq tiqlàngce shø̀mwā vl nø Ukren mongdàn dvpvt  ' Vsvngpvn dvciò chømyo vjø̀ng Mari ' kaq vjúrøt tvle ā lvm rvt røtnímshì bǿì. Wè Mari nø ' Belarus ' mongdàn taq vpǿ shvrìngò we íe.