Yohan vgo tu:tnò we

Saturday, August 03, 2019

Gvray Mongka Tiq Tut

Lewi 25:1,8-17

Sinay shigùng mvdv̀m yv́ng Yehowaí Moshi svng yadø a:lòe. Nārnǿng shvngøt nǿng shvngøt kvt vhø̄m dø, vbìcé dvgø̀ nǿng gø̄m dø angnǿng rø̄ ràe. Wenǿng shvngøt shvlá tiqcé ni, Mvrà dvpvt Shvmāā we Angni taq, wemóng móngkøp taq vyv̀ng rø̀ng dòdi møt ràe. Wekvt pùngwàcé nǿng wanǿng svng nø shø̀ngshāng mvzì nø, shvlànglv́m nǿng íe wa móngkøp svng kà dvkāng rà we angnǿng íe. Wenǿng nø Jubili* nǿng í rvtnø, namaqí vwv̄nshaq rvgaqri nø angkàng svng vtv́nga nø, vshuqrì gø shvlàng nø dèrì dèrvp yv́ng svng shvlō ràe. Pùngwàcé nǿng wanǿng nø namaq dvpvt Jubili nǿng íe. Wervtnø̀ wenǿng taq rvmá wàv́m mvdaq. Rø̀nggoq hv́ng kèní angrá gø, màshv̄ngshaq bìm kùlwàng kèní bìmshírì gø dvkø̄mv́m mvdaq. Kadø íe wani wenǿng nø Jubili nǿng í rvtnø namaq dvpvt shànshér dø shvgaqshaq nǿng íe. Wenǿng taq namaq nø vmli v́m nø v́l ràe. Namaqí èwv̄n bǿshà we zaqshøp rvgaq í dv́ngte nø Jubili nǿng taq rvgaq angkàng gǿ svng vtv́ngā ràe. Namaq nø rvgaq nànv̄mkénø̀ng nìgø, nawv̄nkénø̀ng nìgø, namaq tasv̀ng mènàyùmkénøngni. Namaq rvgaq nàwv̄nké daqnø̀ng dvgvp, Jubili nǿng mèpvng kadv́ng nǿng vléá:mì lòng svng sūn nø wv̄nshi ràe. Mø̀íni Jubili nǿng mvhøqò vzv̀ng kaq mvzí dvyø̀ kadv́ng jv́ng dvkø̄mv́m lúnshìlv́m í we svng dak nø nv̄mā ràe. Jubili nǿng høqlv́m mvme nǿng rà kvt kèní nø, dvpǿ té zí ràe; Jubili nǿng høqlv́m gvzà nǿng mvrà kvt kèní nø angdvpǿ cv̀m dø zí ràe. Pàwálv́m wani vnv̄māke we nø angjv́ng ku íe. Namaq tāsv̀ng mènayùmkénø̀ngni. Namaq Gvray kaq mv̀ng vpǿ svre ràe. Kadø íe wani Ngà nø namaq Gvray Yehowa ǿngàe.

Mati 14:1-12

Wervtø̀ taq, vbì wál tiqwál øpshú dùgàmzø̀ Herodní nø, Yesu mòng tá bǿà nø; ang dvzømcèrì svng, “Yapè nø Tiløp Yohan ni íe. Ang nø shì yv́ng kèní zūn lú:ngì weí, dvdv̄m vtiqlv́m jórnònggùn bv̀nlì yarì wàò we í pà íe,” wae. Kadø íe wani Herod A:ngí nø, angnv̄m pè Pilip chø̀mmè Herodiaí dvzà:ngò rvtnø, Yohan svng ta:pmò nø, tūng taq róng yà:ngà. Pàwá wani Yohaní ang svng, “Herodia svng nà èlūshi we nø màdvrá,” vl yà:ngà. Herodní ang svng shvt mvyǿ nìgø, bashà rìí Yohan nø kàdvtutshú dvdu:tnò rvt, ang svng shvt mvkā:mò. Iwe, Herod gv̀l yà:ngà ni vhø̄m ráì kvt, Herodia angcè mè nø angmaq mv́rdv̀ngø shvlv́mshi weí Herod svng nøt shvbyoòe. Wervt ang dvgv́mshi taqsórí wemè kapà røt nìgø zílv́m a:ngí dv́nāòe. 8 Chø̀myoré mè nø angmèí dvzà:ngò dø cà:nò nø, “Tiløp Yohan ang vgo chv̀ng kung tiq gø̀m taq èzá:ngò nø ngà svng èzǿngà,” a:lòe. Koqkv́m pè nø nøt dvshàá:mì we ínìgø, ang dvgv́mshi bǿì kà rvtnø gø, ang nvng tiqdø v́mpà v̄m rì rvtnø gø, wedøni zílv́m dvká:mòe. Wervt a:ngí tūng vdòng svng vsvng dvzá:rò nø Yohan vgo tut dvzá:ròe. Wekvt Yohan vgo chv̀ng nø kung tiq gø̀m taq lv́nga:tnà nø, chø̀myoré mè svng zí bǿà nìnø, wemèí rá angmè svng lv́ngā bǿà. Wekvt Yohan coqcv́nrì dì ráì weí, vnàng lòng baq bǿà nø kǿ:mò dá:ngí, Yesu yv́ng svng di nø dvtáòe.