Vkangpè Yesuí vjúrøtlv́m dang shvngøt we 

Shvngbe mvdvm Gvray mongzøl lòng laqtuqdaq, Dèni Gvray gvsang Mongkà taqkèní nònggùn vzíkélvm Mongkà nø Mati 7:7-12 vdòng taqkèní íe. 
Vkangpè Yesuí vjúrøtlv́m dang shvngøt we 
Erøtnøng; wekvt namaq svng èzí daqnø̀nge. Elánøng; wekvt lá èlún daqnø̀nge. Nàkoqnøng; wekvt namaq svng ètánā daqnø̀nge.  Kadø íe wani røt gǿí nø lú:nòe. Láò gǿí gø, lá lú:nòe. Vkoqò gǿ svng gø tánā daqòe. 9 Nvcè zidòng røtshì ra ke, lóng èzínøng we namaq kagǿ èv̀lnønge ma? Ngā røt rā ke, ang svng bø̀ èzínø̀nge ma? Vsvng mvgv́mrì namaqí dv́ng nvcèrì kaq gønpaq shvlá zí èshánøng kèní nø, muqlàng taqlap v̄l pè namaq Nvpèí nø, Ang kaq røt rārì svng wemvdv̀mø té mvzv́n gønpaq shvlári zí mvsháòni ma? Wervtnø̀, vsa:ngí namaq svng kadø wáalv́m èshòngnøng nìnø, namaqí gø angmaq svng wedø tiqdvchá èwáānøng. Pàwá wani yalòng nø Dvrá lòng nvng Kàdvtutshú kàrurì taq shvngøt we mvshǿl shvniq íe. wàe.

Vpø íwe pèmè vnvmchvngmaq
Dèni tá lúnì we Gvray gvsang Mongkà taq nø Vkangpè Yesu Hkristu ínø vjúrøtshìlvm dang nvng àngde nvng nítvp we tiqdvr vsvngrì mvdvm shóngnønt gvlshìlvm, Nønt yvnggúng wáshìlvm nvng vzaqshì nønt vl ra íwe dang svng  dvkvme. Vjúrøt shì lòng nø gvzà vchvk pàdø gvzà nònggùn vzàm vl we íe. Pawalvm wànì Gvray ínø dìngman Vsvng gø'ò vjúrøt kà svng zø'àe. Cìpshì weí Jø'ngjø'ngni ra vchvkdang taq vjúrøt we la vlni gø mà:pnønt, dvgoqnønt dvnzøng we shvrarì taq nø vjúrøtkà lòng nø nònggùn mà-vl weí vmøl vmvngsháòe. 

Shaqcvm lvmrì ,mvra rì v-li we rvgaq tømò angpè rì ídvng àngdeò angcø àngcèrì kaq svng shvla lòng svng zí sháì nìnø shvlá vtv'ng kømzup we Vpè Gvray gvsang ínø nøngmaqò vjúrøt kà svng zø'à vtōà nø dvbvng lvm vlē.
Íni gø nøngmaq taqkèní Nønt vwángshì we, dìngman dø cìpshì we, dvshá zā mvyø we shóngnønt, kvmnønt kèní røtnímshìlvm nø gvzà vchvk nge wadang svng shvdømè.

Vpø íwe pèmè vnvmchvngmaq 
Vkangpè Yesu Hkristu ínø Gvrayò shóngnønt svng síngràl weí Mvngsher we Kvmnønt, shóngnønt, cìpshì nønt, vlømshì nøntni røtnímshìlvm rvt kàshvbóng mvshøl taqkèní lùnø shvngøt dètú íwe Mongkà íe. Shvngbeí Gvray mongzøl lòng vtoshì leqlúnøng. Shvngbe svng oqā.