Yesu nvng Beelzabul

Luka 11:14-23 Yesu nvng Beelzabul

Dèni nár vbí ni rø v-du we Pvlàcè nònggùn lùshì lvm Gvray móngkà nø " Luka 11:14-23 ciq vdòng taqkèní íe.Màá cáng lú:ngò we dang "

Tiq ni taq Yesuí màá tiq gǿ kèní màá cáng tiq long lú:ngòe. Cáng lúshiá:mì kvt, màá gǿ nø kà shø̀n lú:ngì; vsvng loksokrì nø dádv̀ng wae f 15 Iwe tiqmaqí, “A:ngí nø cáng koqkv́m Beelzabul nonggùn kèní cáng lú:ngòe,” wae. 16 Dvgá maqí nø Ang svng vlø:tnò sórí, muqlàng kèní shálv́m mvshv́lpvrá tiq lòng dètanshà, wa røtshìe. g 17 Angmaq nøt vdòng dvda:mò rì A:ngí sháò rvtnø angmaq svng yadø a:lòe. “Ang nø ang vpokē we móngdàn kamóngdàn ínìgø vcatnv̄me; angmaq nø angmaq vpōke we vsvng karvp ínìgø vcatnv̄me.

Ngàí nø Beelzabul nonggù:ni cángrì lù:ngòe, èvlshàe. Satan gø ang nø ang vpōke kvt kèní ang móngdàn nø kadøwa lvzá:nòni? 19 Ngàí Beelzabul nonggùn kèní ni cángrì lùngò we lā í kvt kèní nø, namaqò coqcv́n cèrìí cáng lù:ngò we nø kagǿ nònggù:ní lú:ngòe ma? We rvtnø angmaq nø namaq svng kà rvtshú wáshì longe. 20 Inìgø Ngàí nø Gvray nònggùn kèní cángrì lùngò we í nìnø, Gvray móngdàn nø namaq yv́ngø tuq daqì we íe. h

Shvrē pè nø cìldànkùng rì gwashi nø ang chø̀m svng roqshì kèní ang zaqshøp rì nø pàmvrà v́lāòe. 22 Iwe ang mvdv̀m té jòr we shvrē tiq gǿ di ra weí ang svng jorv̄m nìnø, ang vlǿmshì we ang cìldànkùng rì shvngbe kutwa tø̄lv́m bǿò nø, ang zaqshøp rì gø vwālshì bø̄e. i 23 Ngà svng mvcv̀n gǿ nø Ngà kaq vtù gǿ íe; Ngà nvng màdvkømvm gǿ gø, dvkangshú íe. wàe.

Vpø íwe pèmè vnvmchvngmaq Vkangpè Yesuí nø Àngò dvbùshang Sasvna bvnlìrì svng rí nø dvnungò taqsórì cáng nvng svmi móngdàn bvngka ngvnshà rì í jór mv-lún we Gvray gvsangò móngdàn svng vrvng yangà. Wervt nøngmaq shvngbe síngràl nønt, Kvmnønt taqkèní rvzvngshìlvm búngá:mì. (1) Hkristu nvng tiqdø vl lvm ma?, (2) Vkangpè svng vtù nø Cángò dvløt gvzàm we mvra vdòngø vl lvm ma? Vkangpè ínø cáng kaq dvsherò weí cáng kaq lùngò dang dvtánòe. Íwe vsvngrì nēni vdá i taqsórì mv-yàngì, v-na vdá i taqsórì mvtáì. Vkangpè Yesu svng le Satanpe wànø vtù vre shø'n vlé sháì we dang svng yv'nglún shìe. Tiqmaq nø Muqlang kèní lvmit kùmlà tiqlòng lòng svng røt dvdà:m mvyø we Nønt rì zàng sháì we svng yv'nglún shìe.

Vpø íwe pèmè vnvmchvngmaq Gvray gvsang nø nøngmaq nvng tiqdø vlē. Vkangpè kaq svng shóngnønt vjøngí ká:mì nø shóngshìlòng mvdvm pà lvmit kùmlà lvrà ni ma?. Vkangpè Yesu ínø nøngmaq kaq svng dønggvng dø kám we rvzvngce wáshì lúnlvm shvrúngè, Gvray móngdànò Pvlàcè ìshøt igvn vtoshì, dvkømvm lúnlvm rvt shóngnøntni ègo íwe Gvray gvsangò Mongkà íe. Shvngbeí Gvray mongzøl lòng vtoshì leqlúnøng. Shvngbe svng oqā.