júrøt shì lòng nø lvpat taq mongzøl byōlvm mvdøng mvnggá íē.

Yesu nø bìmrøng mvdø̀ng í we

Dèni Pvlàcè nònggùn lùshì lvm Gvray móngkà nø John 15:9-11 taqkèní íe.

Yesu nø bìmrøng mvdø̀ng í we

9 Vpèí Ngà svng èshòng dø, Ngàí gø namaq svng shù:ngìe. Ngà shóngnøt vdòng taq namaq v́ldv̀ng èwànø̀ng. 10 Vpè dvkv́mkà Ngàí cv̀nò nø, Ang shóngnøt vdòng taq v̄l dø tiqdvchá, namaq gø Ngà dvkv́mkà cv́n èdøngnøng kvt nø, Ngà shóngnøt vdòng taq v́ldv̀ng èwà lóngnønge. g 11 Ngà dvbù nøt namaq vdòng taq vl yv́ng kèní namaq dvbùnøt dv̀n zø̀nglv́m dvpvt, Ngàí namaq svng yadv́ng pv̀n dvtá bǿshà we íe. h 

Vpø íwe pèmè vnvmchvngmaq tá lúnì we Mongkà taq "Vpèí Ngà svng èshòng dø, Ngàí gø namaq svng shù:ngìe." wàwe dèniò mongkà kèní Vkangpè Yesu nø nøngmaq kaq svng kadvngte shóngwá:mshìe wà dang svng yv'nglúnshì we íe. Vkangpèò shóngnønt nø àng taq vl we ídv'ngte shvngbe svng zílún we shóngnønt pvn, lvngdøm màpvng mà-vl we shóngnønt pvn, mvcíng mvràlshi we shì we shóngnønt pvn íē.

Vrá nø bìmrøng Kà shvbóng taqkèní gø shvngøt dvtú we mvdvm àngò shóngnønt Dvrá vdòng taqø cúnshì lúnlvm, Àngò dvkv'm kà taqkèní øpshì lúnlvm gø dè ká:mìe. 

Rvzvngce lvpat mongzøl nø byō lòng nø Kvmnønt tvrà taq mongzøl nø byō gø íe wàe. Kvmnønt tvrà taq kømzup rà kvt mongzøl byōlvm lòng gø tuqdaq we íē. Vjúrøt shì lòng nø lvpat taq mongzøl byōlvm mvdøng mvnggá íē. Jø'ngjø'ng mongzøl gø nø byō è, jø'ngjø'ng byō gø nø mongzøl we íē.

"Your love is your weight" wànø Shànshér pè augustiní shøn yangà. Nàò shóngnønt nø nàò weight 'vlé ' íē. Nàò shóngnønt nø nà lvpatnò dvpø íē. Shóngnønt téte dvshàshà nà lvpat téwa kømzup lúnlvm vlē wàwe àng lvjøm íē.

Vpø íwe pèmè vnvmchvngmaq Vkangpè Yesuò shóngnønt lvpat taqø rvtø vrvm vhøm mv-ngú nø vzø'm weí Hkristu Yesu í zi we Vpø vtv'ng kømzup we jèjú vdòng taq mvng mongzøl lòng nvng dvbú Nønt shøm laqlúnī. Shvngbe svng oqā.